Xefe Suku Mulo, Postu Administrativu Hato Builico, Munisípiu Ainaro, José Florindo Andrade. Imajen Tatoli/Arminda Fonseca

AINARO, 07 setembru 2021 (TATOLI)-Xefe Suku Mulo, Postu Administrativu Hato Builico, Munisípiu Ainaro, José Florindo Andrade informa, komunidade aldeia  haat iha Suku Mulo dezde Timor-Leste restaura nia independénsia to’o agora seidauk asesu liña eletrisidade.

Notísia Relevante : MAPKOMS lansa Naroman ba Suku iha Mulo

Nia hatutan, Suku Mulo iha aldeia ualu hanesan, Aldeia Mulo, Tatiri, Hautio, Aituto, Manumera, Mau-Lahulo, Ble-Heto, no Queo-Rudo. Hosi aldeia ualu ne’e aldeia haat ne’ebé seidauk asesu ba liña eletrisidade mak, Queo-Rudo uma-kain 280, Ble-Heto uma-kain 89, Mau-Lahulo uma-kain 81 no Manumera uma-kain 80.

Nia haktuir, komunidade ne’ebé daudaun seidauk asesu ba liña eletrisidade ne’e iha aldeia haat refere kompañia balu uluk monta tiha ona besi-riin sira ne’e, maibé to’o agora komunidade seidauk asesu ba liña eletrisidade.

“Ita-nia komunidade ne’ebé seidauk asesu ba liña eletrisidade ne’e proposta ita hato’o dala barak ona parte relevante no ha’u rasik horiseik (06/09) ba hasoru tan Eletrisidade de Timor-Leste Empreza Públika (EDTL E.P) munisípiu nian, maibé sira dehan sei hato’o ba nasionál ne’ebé to’o agora ami seidauk rona informasaun ruma,” José Florindo Andrade ba Agência Tatoli iha Sede Suku Mulo, tersa ne’e.

Komunidade mós enfrenta difikuldade seluk mak hanesan kona-ba estrada, tanba estrada dirasaun hosi nasionál ba to’o Suku Mulo di’ak maibé hosi Suku ba fali aldeia sira mak ladi’ak ida ne’e mak difikuldade boot ida ba komunidade.

Nia afirma, uluk sira ho programa $3.00 mak hadi’a estrada, maibé tempu udan mota tun estraga hotu ne’ebé agora buat ruma iha  Postu Administrativu Hato Builico tenke la’o ain han kilómetru 17 to’o Postu Administrativu Hato-Builico.

Jornalista       : Arminda Fonseca

Editór           : Francisco Simões

HAKEREK NO HATÁN

Please enter your comment!
Please enter your name here