Komandante Unidade Patrullamentu Fronteira (UPF), Superintendente, Euclides Belo, hala’o vizita dahuluk ba postu UPF foun iha suku Saburai. Imajen Tatoli/Sérgio da Cruz.

BOBONARO, 06 setembru 2021 (TATOLI)-Operasaun sekreta Unidade Patrullamentu Fronteira (UPF), domingu horiseik, detein joven ida laiha identidade ne’ebé haku’ur tama mai fronteira terrestre Timor-Leste nian ilegálmente.

Notísia Relevante : Semana tolu, PNTL detein ema na’in 153 hakat ilegál

Komandante UPF, Superintendente Euclides Belo, informa, iha domingu kalan, purvolta tuku 19: 00 Otl, servisu sekreta UPF halo viziñansa iha mota laran área Batugade, Munisípiu Bobonaro, konsege halo detensaun joven  na’in ida ho inisiál FDC hosi Halin Sanan-Batugade, ne’ebé tama mai hosi Atambua-Indonéziu laho  dokumentu komprovativu.

Hosi rezultadu identifikasaun UPF nian, joven ne’e ho idade tinan 23, moris no sarani iha Indonézia, enkuantu durante ne’e Xefe Aldeia ida mak hakiak nia iha Batugade no joven refere seidauk iha kartaun eleitorál, maibé naran rejistadu ona iha visa família uma-kain.

“Sidadaun ne’e tama ilegál ba Atambua, iha fulan setembru 2020, hafoin nia fila mai ita nia membru sekreta UPF detein kedas iha área Mota laran, agora daudaun ita halo hotu ona identifikasaun no entrega ona ba parte saúde ekipa COVID-19 hodi kumpre kuarentena durante loron 14 nia-laran,” Euclides Belo informa ba jornalista sira, domingu (05/09).

Membru UPF nafatin halo vijilánsia iha área sira ne’ebé konsidera risku movimentu ilegál hodi evita atividade merkadoria ilegál ba sasán kontra bandu no prevene variante Delta labele transmite mai Timor-Leste.

Tuir dekretu Governu númeru 18/2021,1 jullu kona-ba medida ezekusaun deklarasaun estadu emerjénsia efetua hosi dekretu Prezidente Repúblika númeru 39/2021,30 juñu ne’ebé iha artigu 7 obrigatóriu kontrola sanitaria, iha alínea 4 hateten ba indivíduu ne’ebé tama-sai territóriu nasionál ho dalan ilegál sei hetan multa selu koima ho valor mínimu $30.00 no másimu $250.00.

Bainhira Servisu Migrasaun kompleta ona identifikasaun, sei relata mós ba komandu PNTL liuhosi servisu investigasaun, hodi loke prosesu kriminál  tanba dezobediénsia ba regra hodi submete fali ba Ministériu Públiku (MP) atu aprezenta ba Tribunál.

Jornalista   : Sérgio da Cruz

Editor        : Francisco Simões

HAKEREK NO HATÁN

Please enter your comment!
Please enter your name here