Prezidente CLN, Gervásio Cardoso de Jesus da Silva. Imajen TATOLI/Florêncio Miranda Ximenes

DILI, 06 setembru 2021 (TATOLI)–Prezidente Sentru Lojístika Nasionál (CLN, sigla portugés), Gervásio Cardoso de Jesus da Silva, hateten, daudaun ne’e iha ona planu atu sosa tan foos tonelada 10.000 atu reforsa stock nasionál.

“Ami iha planu ona atu halo importasaun ka sosa foos tonelada 10.000 tanba stock nasionál la sufisiente no ita laiha dalan seluk atu reforsa stock nasionál,” Prezidente CLN hateten iha edifísiu Ministériu Finansa, Aitarak-laran, segunda ne’e.

Governu liuhosi CLN prevee ona orsamentu millaun $6 hodi sosa foos tonelada 10.000 hosi estranjeiru.

Governu antes ne’e halo importasaun foos tonelada 30.000 hosi Vietname, maibé hela de’it tonelada 5.000 iha armazen nasionál.

Maski sosa foos hosi rai-li’ur, maibé CLN sei kontinua fó prioridade ba sosa hare kulit hosi povu agrikultór atu motiva sira, nune’e bele lori komunidade halo natar no to’os.

CLN mós nota produsaun hare iha rai-laran hahú sa’e maka’as hafoin implementasaun programa Cesta Bázika.

“Ita la’o ba iha Maliana sosa hare kulit tonelada 500, Natarbora tonelada 20 no seidauk konta sosa hosi munisípiu seluk,  nune’e CLN sei kontinua prioritiza sosa haree kulit hodi halo balansu ho produsaun rai-li’ur,” nia hatutan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here