Enkontru via zoom entre membru Governu relevante no parseiru hodi ko’alia kona-ba dezenvolvimentu setór tolu iha Timor-Leste. Imajen/UE

DILI, 06 agostu 2021 (TATOLI)-Delegasaun Uniaun Europeia (UE), no Banku Investimentu Europeu (EIB) hamutuk ho Komisaun Diretiva Projetu  (PSC, sigla inglés) hosi Programa Preparasaun no Implementasaun Projetu (PPIP), halo enkontru virtuál hodi diskute projetu potensiál iha setór bee, reziduu sólidu, no floresta ba Timor-Leste.

Vise Primeiru-Ministru no Ministru Planeamentu no Territóriu, Jose Maria dos Reis, agradese partisipasaun audiénsia no rekoñese progresu PPIP, ne’ebé relata iha relatóriu inisiál ka Inception Report, aprezenta oportunidade ba investimentu ne’ebé sei revee no atualiza hodi garante susesu iha implementasaun projetu.

“VIII Governu Konstitusionál iha kompromisu ba dezenvolvimentu iha parte súl Timor-Leste no rekomenda ba konsultór atu esplora dezenvolvimentu barrajen multi-funsaun ne’ebé di’ak ba abastesimentu bee, agrikultura no enerjia iha rejiaun ne’e,” refere nota ne’ebé Agência TATOLI asesu, segunda ne’e.

Enkontru ne’e via Zoom ne’e partisipa hosi Ministru Administrasaun Estatál, Miguel Pereira de Carvalho, Ministra Negósiu Estranjeiru no kooperasaun, Adaljiza Albertina Xavier Reis Magno, Ministru Finansa , Rui Agusto Gomes,  EIB nia Xefe Gabinete iha Pasífiku, Benoit Cambier, inklui  reprezentante sira seluk husi Governu Timor-Leste, EIB, EU, no konsultór PPIP nian COWI A/S.

Governante ne’e konsidera aspetu xave balun ba susesu programa mak fortalesimentu rekursu umanu no instituisaun, envolvimentu setór privadu, no transferénsia koñesimentu hosi konsultór COWI ba funsionáriu nasionál, liu-liu ba jerasaun foin-sa’e.

Nune’e, Ministru hatudu ninia optimizmu ba faze identifikasaun projetu ne’ebé sei lori ba to’o iha faze pre-viabilidade no viabilidade ne’ebé susesu no implementasaun globál projetu.

PPIP ninia objetivu atu apoia identifikasaun, preparasaun, no implementasaun projetu investimentu ne’ebé mak téknikamente, finanseiramente, ekonomikamente, ambientalmente, no sosialmente di’ak iha setór tolu hanesan fornesimentu bee, saneamentu no drenajen, jestaun reziduu sólidu no floresta.

Projetu ne’e ofisialmente lansa ona iha loron 10 fulan-juñu 2021 ho sorumutu abertura (kick-off) ida entre reprezentante Governu Timor-Leste, Banku Investimentu Europeu, Delegasaun UE iha Timor-Leste, no COWI nu’udar konsultór projetu.

Hafoin fulan rua, Komité PS), ne’ebé kompostu husi reprezentante nível a’as sira hosi Governu Timor-Leste nian, delegasaun UE iha Dili no EIB, hala’o sorumutuk hodi ko’alia kona-ba progresu hosi projetu, planu ba atividade kapasitasaun inklui ideia projetu balun entre asuntu xave sira seluk tan.

UE hakarak promove dezenvolvimentu ekonómiku

Iha biban hanesan, Embaixadór UE iha Timor-Leste, Andrew Jacobs, afirma sinerjia entre serbisu delegasaun UE la’o hela  iha setór tolu ne’ebé abranje hosi PPIP.

“Uniaun Europeia hakarak promove dezenvolvimentu ekonómiku no prosperidade iha Timor-Leste liuhosi kreximentu ekonómiku sustentável ne’ebé matak no azul,” nia subliña.

Diversifikasaun no dezenvolvimentu ekonomia reprezenta oportunidade la’ós de’it ba Timor-Leste,  maibé ba setór privadu Europeu no ba investidór no Banku investimentu sira.

Tuir nia, oportunidade sira-ne’e eziste liuliu iha dezenvolvimentu cadeia de valor (value chain) iha agroflorestál (merkadu nixu/sertifikasaun), sertifikasaun karbonu, enerjia renovável, peska sustentável, akuakultura no konservasaun biodiversidade.

Nune’e mós, Koordenadór Projetu Banku Investimentu Europeu,  Raoul Pedrazzani, esplika daudaun ne’e hakat ona ba identifikasaun projetu.

Iha faze ne’e, presiza konsulta ho Governu Timor-Leste, promotór, benefisiáriu no ko-finansiadór potensiál sira, ne’ebé hanesan xave ba susesu implementasaun projetu sira ne’ebé elijível.

“Projetu sira-ne’e tenke kumpre padraun ambientál no sosiál, maksimiza asaun klimátika no sustentabilidade ambientál. Ha’u satisfa ho kolaborasaun di’ak entre Governu Timor-Leste no ekipa projetu,” nia dehan.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here