Diretór Sentru Treinamentu Vokasionál Juventude Bairru-Pité Dili, Leonito Mendonça.Imajen/Tatoli Nelia Fernandes.

DILI06 setembru 2021 (TATOLI)—Diretór Sentru Treinamentu Vokasionál Juventude (STVJ) Bairru Pite, Dili, Leonito Mendonça, informa sentru ne’e sei hahú fila-fali atividade formasaun iha semana oin, iha loron 13 fulan-setembru tinan 2021.

Notísia Relevante: STJV Dili adia formasaun ba fulan oin

“Ami-nia formasaun ne’e, ami bazea de’it ba situasaun konfinamantu domisiliáriu ne’e, tanba ami-nia preparasaun sira ne’e hotu ona. Tuir lolos, iha loron ohin (segunda, 06/09) ne’e, ami hahú ona formasaun maibé iha Konsellu Ministru estende tan konfinamentu obrigatóriu iha Dili to’o kinta (09/09), entaun iha loron 13 setembru ne’e, ami kontinua kedan ho ami-nia formasaun,” Leonito Mendonça hateten ba Agência Tatoli, via telefónika, segunda ne’e.

Bainhira atu hahú atividade formasaun, sentru ne’e sei fó sai informasaun ba formandu sira liuhosi pajina facebook STVJ Bairru Pite nian no kontaktu direta ba formandu sira liuhosi telefone, nune’e sira bele fila-fali mai hodi tuir atividade formasaun.

Nia dehan, totál formandu iha sentru ne’e hamutuk 50 ka 60% mak kompleta ona vasina ba doze daruak inklui formadór sira.

Tanba, tuir nia, kritéria ida atu tuir formasaun mak formandu no formadór sira tenke aselera lalais prosesu vasinasaun, no oras ne’e sira simu ona vasina no balun mak seidauk simu vasina doze daruak, atu nune’e sira bele partisipa iha atividade formasaun ne’e.

Totál formandu ba tinan ida ne’e hamutuk 80, ne’ebé kompostu hosi área administrasaun na’in-51 no ospitalidade na’in-29 ho totál funsionáriu no formadór hamutuk na’in-10.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here