Formandu sira hosi área kustura halo hela prátika oinsá tesi “pola”. Imajen/Espesiál.

DILI06 setembru 2021 (TATOLI)—Koordenadora Sentru Formasaun Komputer no Kustura (CFCC, sigla portugés) Failuro, Irman Ines Freitas Bartolo, informa maske Governu implementa serka sanitária iha munisípiu Lautám maibé sentru ne’e kontinua hala’o atividade formasaun, tanba daudaun ne’e formandu sira tama ona ba faze estájiu.

“Iha ne’e serka sanitária maibé atividade formasaun kontinua la’o. Daudaun ne’e, ami-nia formandu sira tama ona ba faze estájiu nian, entaun sira ba ona halo esperiénsia servisu nian maibé sira hala’o estájiu iha Lautém laran de’it. Tanba ho serka sanitária, entaun sira halo esperiénsia servisu iha ne’e de’it,” Irman Ines Freitas Bartolo hateten ba Agência Tatoli, via telefónika, segunda ne’e.

Programa estájiu ne’e sei la’o durante fulan rua (2), no totál formandu sira-ne’ebé hala’o estájiu ne’e hamutuk 53, kompostu hosi formandu sira iha área administrasaun no kustura nian.

“Daudaun ne’e, sira ne’ebé tuir formasaun iha área administrasaun nian, sira halo ona estájiu iha Edifísiu Administradór Lautém (kantor bupati Lautem), CNE, no SEFOPE. Formandu na’in-rua hosi área kustura nian, mak hala’o estájiu iha de’it,” nia dehan.

Formandu sira hosi área komputadór tuir hela formasaun iha aula laran. Imajen/Espesiál.

Formandu na’in-rua hosi área kustura nian ne’e, durante hala’o estájiu ne’e sira aplika fila-fali buat ne’ebé durante ne’e sira aprende iha sentru ne’e hodi prodús fali produtu lokál hanesan suku pontu cruz, bordadu, no mós suku roupa, ne’ebé bainhira halo pameran ruma, sentru ne’e koko atu halo promosaun kona-ba sira-nia obra ne’e.

Formandu na’in-53 mak daudaun ne’e hala’o estájiu no formandu na’in-15 mak hela iha colégio, no restu fila-fali ba uma tanba formandu sira-ne’e maihosi Dili no balun hosi munisípiu seluk, no Lautém nian oan sira fila-fali ba sira-nia família.

Formandu na’in-15 hela iha colégio ne’e tanbá ho situasaun serka sanitaria ne’ebé sentru ne’e la haruka sira fila ba uma, tanbá problema ho moras COVID-19.

Maske formandu sira hela iha colégio maibé sentru ne’e nafatin kumpre regra hosi Ministériu Saúde (MS) no Organizasaun Saúde Mundiál (OMS) hanesan fase liman, uza maskára, no halo distansiamentu sosiál.

Nune’e, nia dehan, atividade estájiu ne’e hanesan, parte ida atu formandu sira aplika buat ne’ebé mak durante ne’e sira hetan iha sala-de-aula laran durante sira tuir formasaun ne’e.

Atividade estájiu nian, formandu sira hahú iha 08h30 to’o 12h00, hafoin ne’e deskansa tiha iha tuku 14h00 no sei kontinua fila-fali atividade estájiu to’o 07h30.

Totál formandu na’in-53 ne’e mai hosi munisípiu Viqueque, Ermera, Dili, Ainaro, Bobonaro, no Lospalos.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here