Igreja Ave Maria Suai. Imajen/Espesiál.

DILI, 06 setembru 2021 (TATOLI)–Deputadu Bankada Frente Revolusionária Timor-Leste Independente (FRETILIN), David Dias Ximenes ‘Mandati’ bele perdua malu labele haluha fiar iha pasadu tanba to’o oras ne’e família vítima sira moris hela ho tristeza.

Notísia Relevante: Rodolfo: “Milísia sira oho no sunu ha’u nia fen ho oan”

Membru PN husi Bankada FRETILIN no membru Komisaun B, David Dias Ximenes “Mandati”. Imajen/ António Gonçalves.

“Ita halo rekonsialiasaun ho Indonézia, iha rekonsialiasaun ne’e atu ita perdua malu maibé labele haluha ema-nia família ne’e, ema-nia oan ne’ebé oho iha nia oin ne’e, ita obrigadu atu haluha tiha de’it ka lae. Ita tenke tuur hamutuk ko’alia hodi haree ita-nia ema sira-ne’e,” David Dias Ximenes “Mandati” hateten ba jornalista sira iha ámbitu komemorasaun masakre Setembru Negro (06 setembru 1999) iha Covalima (Suai), iha uma fukun, segunda ne’e.

Nia haktuir, ohin ukun rasik aan ona, laiha ona guia de marsa (surat jalan), laiha ona pasa-revista iha dalan, maibé timor-oan sira-ne’ebé nia família sira membru milísia sira oho ne’e laran sei moras no kanek hela.

“Ita tenke hanoin ida-ne’e, liu-liu maun boot sira tenke hanoin mós família sira-ne’ebé nia feen no oan, ema oho no sunu. Loloos ne’e ita hotu tuur hamutuk halo reflesaun, sera que ema sira-ne’e mate balada fuik laiha na’in. Boot sira tuur imajina labele dehan katak ukun rasik aan ona ne’e loos hotu ona, ita di’ak malu ho Indonézia ona ne’e,” nia lamenta.

Deputadu Mandati sempre levanta iha plenária ko’alia Nicolau Lobato no timor-oan sira seluk ne’ebé mate, ne’ebé to’o oras ne’e Indonézia seidauk hatudu fatin sira hakoi ema sira-ne’e no sira-nia ruin iha ne’ebé.

“Ita-nia mate-ruin sira-ne’e tau iha-ne’ebé fó ona mai. Ita ba-mai, maibé ida-ne’e la fó de’it ne’e. Apartir Nicolau Lobato, ema iha Covalima-Suai, kaer hamutuk sunu hanesan animál, ida-ne’e labele ka. Ita tenke hanoin malu uitoan, labele hanoin de’it ita-nia aan,” Deputadu Bankada FRETILIN ne’e hateten.

Nia husu líder sira tenke tuur hamutuk hanoin apartir frente armada, frente klandestina, frente diplomátika, la’ós lori fali ema seluk ne’ebé mak la envolve mak ko’alia fali.

“Tuur hamutuk atu ita-nia ema mate hanesan ne’e, saida mak ita bele halo, la’ós hanesan kompeensasaun ne’e. Ema sira-ne’ebé mate ne’e, nia familia la’ós sosa ho osan. Tenke tuur hamutuk, ita ko’alia ho Indonézia sira. To’o agora, ha’u foti kuaze tinan rua ona, Nicolau Lobato nia isin-mate mós la mai tiha de’it,” nia dehan.

Mandati kestiona tanba parte Indonézia nian mai vizita sira-nia jardim dos herois hanesan Taman makam Pahlawan Seroja no Baucau maibé parte Indonézia mós la hatudu timor-oan sira-ne’ebé mate rate laiha.

“Ita-nia maluk sira iha Covalima-Suai ba tuur iha Igreja tanis, ita la hanoin ita-nia ema sira mate ne’e. Ita buka tuir, tanba saida mak sira sunu,” nia dehan.

Notísia Relevante: Setembru Negro, mate-isin butuk iha igreja oin hanesan foho oan ida

Masakre Setembru Negro nia hun mai hosi 26 fevereiru 1999

Jornalista : Evaristo Soares Martins

Editór       : Cancio Ximenes

1 KOMENTÁRIU

  1. Ita hotu nia resposabilidades ba direitos humanos katak, ita nia governo precisa hanoin oinsa ba maun Rudolfo nia pedidos nebe representa Timor oan nebe vitimas.

HAKEREK NO HATÁN

Please enter your comment!
Please enter your name here