Negosiante ida tuur hein hela nia sasán ne’ebé faan ho karosa iha área Mandarin, Dili. Imajen TATOLI/Antonio Goncalves.

DILI, 06 setembru 2021 (TATOLI)-Jestaun Merkadoria Munisípiu Dili, bandu vendedór-sira fa’an modo-tahan iha trotoar leten durante Governu  aplika konfinamentu obrigatóriu jerál iha kapitál Dili, maibé nesesidade uma-laran,  halo negosiante kontinua fa’an iha trotoar leten hodi la preokupa ho peste letál Covid-19.

Anisa da Costa ho Teresinha Amaral, nu’udar vendedór ambulante iha parte trotoar jardín Bairru-Pité, Dili,  hateten maske loroloron ekipa seguransa Merkadu Munisípiu Dili nian inklui Polísia Nasionál Timor-Leste (PNTL) Munisípiu Dili, avizu ba sira labele fa’an iha estrada ibun, maibé situasaun obrigada sira tenke fa’an nune’e bele hetan osan uitoan hodi sustenta uma-laran.

“Ami ta’uk Covid-19,  maibé ami mós presiza osan hodi hola hahán,” Anisa da Costa ho Teresinha Amaral, hateten ho espontánea hodi responde Agência Tatoli iha Bairru-Pité, Dili, segunda ne’e.

“Antes konfinamentu obrigatóriu ami fa’an  ona no modo-tahan ne’ebé ami fa’an deve ema-nia osan mak fila liman, tanba ne’e tenke fa’an nune’e bele selu deve no bele sustenta ami-nia família uma-laran,”  Teresinha Amaral haktuir.

Tuir  observasaun Agência Tatoli iha terrenu nota katak, vendedór sira ne’ebé fa’an modo-tahan iha trotoar leten iha área jardín Bairru-Pité ne’e maioria la kumpre  protokolu prevensaun Covid-19 nian hanesan uza máskara, distánsia fíziku no la prepara bee ho sabaun fase-liman ka dezinfetante ruma.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here