Pesoál saúde 43 rona esplikasaun hosi pesóal saúde iha Sentru saúde Baucau Ria-mare, Villa nova, segunda (06/09). Imajen TATOLI/Natalino Belo

BAUCAU, 06 setembru 2021 (TATOLI)—Diretór Serbisu Saúde Baucau, Domingos Reinaldo da Costa Guterres, hateten, Ministériu saúde (MS) deside destaka tan pesoál saúde hamutuk 43 atu apoia servisu saúde iha Baucau.

“Daudaun Ministériu Saúde destaka tan funsionáriu kontratadu hamutuk 43, kompostu hosi médiku jerál ida, enfermeiru sia, parteira 16 no saúde públika 17, ne’ebé atu mai apoia tan iha fasilidade saúde sira iha Baucau laran,” Diretór ne’e hateten iha ninia knaar fatin, Ria-mare, Villa antiga, segunda ne’e.

Tuir Responsável Servisu Saúde munisipál ne’e, durante ne’e pesoál saúde iha Baucau limitadu, nune’e MS iha hanoin rekruta tan hodi responde ba preokupasaun ne’ebé durante ne’e iha atu reforsa tan atividade servisu atende públiku.

“Sira atu koloka ba sentru no postu saúde sira ne’ebé mak sira rasik deside durante faze teste laran,” nia akresenta.

Antes atu desloka, pesoál hirak ne’e sei tuir esplikasaun no orientasaundurante loron-tolu hosi profisionál saúde, nune’e bele komprende regra serbisu no kolabora malu entre pesoál saúde sira.

Saúde Baucau presiza nafatin pesóal saúde tanba daudaun ne’e iha funsionáriu balun idade hahú idozu no balun kondisaun saúde la favorável.

“Ita presiza nafatin ema atu apoia tanba pesóal sira ne’ebé iha, balun katuas no ferik ba daudaun no balun iha moras maibé kona-ba rekrutamentu depende ba polítika Ministériu Saúde,” nia hatutan.

Pesoál hirak ne’e sei desloka ba sentru saúde ualu iha Baucau hanesan sentru saúde Uailili, Laga, Vemase, Venilale, Quelicai, Baguia, Ria-mare no Bucoli.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here