Funsionáriu Administrasaun no asistente administrasaun munisipál Bobonaro, partisipa formasaun tékniku administrasaun ne'ebé organiza hosi Diresaun Jerál Desentralizasaun administrasaun, segunda (06/09). Imajen Tatoli/Sérgio da Cruz.

BOBONARO, 06 setembru 2021 (TATOLI)—Ministériu Administrasaun  Estatal  (MAE), liuhosi Gabinete Diresaun  Jerál Desentralizasaun Administrativa, kapasita funsionáriu tékniku administrativa no asistente administrasaun munisipál Bobonaro.

Objetivu hosi formasaun ne’e atu eleva funsionáriu tékniku administrativu-sira nia koñesimentu no abilidade, nune’e bele hala’o atendimentu no komunikasaun di’ak ho komunidade, halo arquivu ba dukumentu tuir sistema no bele hatene di’ak liu tán órgaun soberanu ha’at nia funsaun.

Notísia relevante:Administradór postu administrativu na’in-ha’at iha Bobonaro simu pose

Formadór no peskizadór Institutu Nasionál Administrasaun Públika (INAP), Luis Amaral, hateten Formasaun ne’e importante ba funsionáriu tékniku administrativa, tanba ninia sertifikadu iha valór ne’ebé bele aumenta funsionáriu sira-nia grau.

Bainhira funsionáriu-sira la kumpre durante oras 40 maka formadór-sira sei la atribui sertifikadu no kumpre oras balun de’it sertifikadu ne’e mós sei la vale iha funsaun públika.

“Tuir lei, tinan ida funsionáriu tenke tuir formasaun oras 40 ka loron lima, tanba ne’e presija aproveita oportunidade ida-ne’e didi’ak nune’e aban-bainrua ba tuir teste bele aumenta grau.,” Luis Amaral  hateten ba jornalista-sira iha salaun, Kámara Dioseze Maliana, Bairru Pemancar, suku Lahomea, segunda ne’e.

Formasaun ne’e foka liu ba  matéria, tékniku lideransa, Jestaun projetu, toma desizaun no mós administrasaun públika.

Serkretáriu autoridade munisipál Bobonaro, Júlio Caero, rokoñese durante ne’e atendimentu públiku iha instituisaun Estadu barak ladun di’ak, tanba ne’e liu hosi formasaun ne’e nia espera funsionáriu sira bele halo mudansa ruma.

Formandu Abel da Costa agradese tanba liuhosi formasaun ne’e bele aumenta koñesimentu no abilidade.

Formasaun durante loron lima ne’e hetan partisipasaun másimu hosi funsionáriu tékniku administrativa no asistente administrativa hosi liña ministériu iha munisipiu Bobonaro.

Tuir planu, formasaun ne’e sei implementa iha munisipiu 12 inklui RAEOA, nune’e bele garante sistema atendimentu públiku.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here