Motorizada Yamaha XTZ 150, unidade 29 ne’ebé Ministériu Administrasaun Estatál (MAE) distribui ba funsionáriu Programa Nasional Dezemvolvimentu Suku (PNDS) munisipiu Bobonaro, segunda (06/09/21). Imajen Tatoli/Sérgio da Cruz.

BOBONARO, 06 setembru 2021 (TATOLI)—Ministériu Administrasaun Estatál (MAE), liuhosi Sekretariadu Tékniku Programa Nasional Dezemvolvimentu Suku (PNDS), distribui motorizada Yamaha XTZ 150, unidade 29 ba funsionáriu PNDS munisipiu Bobonaro, segunda ne’e.

Distribuisaun motorizada ne’e atu hadi’a liu tan serbisu funsionáriu sira-nian, hodi kontrola projetu ne’ebé PNDS implementa ona iha suku-sira iha munisípiu ne’e.

Notísia relevante:PNDS implementa ona projetu 973 iha territóriu nasionál

“PNDS nia área kobertura serbisu iha de’it suku. Entaun, apoiu ida-ne’e atu sira bele kontrola di’ak liu tán projetu hotu-hotu ne’ebé implementa iha suku,” Diretora PNDS nasionál, Claudina Pinto, hateten ba jornalista-sira, iha salaun administrasaun munisipál Bobonaro, segunda ne’e.

Distribuisaun ne’e hanesan faze dahuluk ba funsionáriu mane-sira hodi substitui fila-fali motór KLX ne’ebé Governu distribui iha 2013, tanba maioria kondisaun grave no labele ona halo sirkulasaun ba área rurál.

Tuir planu sekretariadu tékniku PNDS mós sei hola tán motarizada kiik ba funsionáriu feto-sira atu bele hala’o serbisu iha baze.

Kona-bá utilizasaun motorizada iha serbisu loro-loron diretora ne’e parte sekretariu tékniku PNDS mós prepara ona orsamentu ba manutensaun ho kombustível.

Motorizada KLX tuan ne’ebé funsionáriu-sira entrega, sekretariadu tékniku PNDS sei lori fali ba halo manutensaun iha Dili, nune’e bele distrubui fila-fali ba funsionáriu tékniku foun-sira, atu bele hala’o kontrolu ba projetu konstrusaun uma kb’it laek ne’ebé daudaun ne’e la’o hela iha munisípiu Bobonaro.

Prezidente Autoridade Munisipiu Bobonaro, Ernesto de Oliveira Barreto, enkoraza funsionáriu-sira utiliza fasilidade Estadu hirak-ne’e ho kuidadu, tanba motorizada hirak ne’e hanesan patrimóniu Estadu ne’ebé hola ho orsamentu Estadu.

Iha tinan ne’e, MAE, liuhosi sekretariadu tékniku PNDS, hola motorizada 384, ho orsamentu rihun $800-resin, hodi distribui ba munisípiu hotu-hotu.

PNDS mós planeia sei hola tán fasilidades sira seluk, hanesan komputadár, labtop, mobiliáriu no ekipamentu tékniku, kamera, botas no seluk tan.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here