Komandante PNTL RAEOA, Superintendente Xefe Mateus Mendes Asunsaun. Imajen Tatoli/Abilio Elo Nini.

OÉ-CUSSE, 06 setembro 2021 (TATOLI)—Komandante PNTL RAEOA, Superintendente Xefe Mateus Mendes Asunção informa, hosi janeiru to’o agostu 2021 ne’e Polisia Nasionál Timor-Leste (PNTL) liuhosi Unidade Servisu Investigasaun (USI) Rejiaun Administrativa Espesiál Oé-Cusse Ambeno (RAEOA), rejista kazu omisídiu tolu (3).

“Iha janeiru to’o agostu, servisu investigasaun konsege rekolla no rejista kazu omisídiu tolu (3), omisídu simples ida (1) no omisídu agravadu rua (2). Kazu ne’e, ami enkamiña ona ba iha Tribunál Distritál Oé-Cusse nian atu halo prosesu julgamentu,” Superintendente Xefe Mateus Mendes Asunção informa ba Agência Tatoli iha Santa Rosa, Oé-Cusse, segunda ne’e.

Kazu omisídu tolu (3) ne’e nia rezultadu hosi akuzaun tribunál ninian katak, suspeitu sira-ne’e hetan ona pena ba iha primeiru interrogatóriu no atualmente suspeitu na’in-rua, PNTL sei asegura hela iha komandu distritál Oé-Cusse hodi hein ordén transferénsia hosi Ministériu Justisa ba iha prizaun Becora.

Tuir rezultadu investigasaun, motivu prinsipál hosi kazu omisídiu ne’e, primeiru mosu violénsia doméstika tanba problema ekonomia familia uma laran, nune’e akontese dezentendimentu no ikus mai rezulta lakon vida.

Aleinde ne’e mós, iha ligasaun ho situasaun atuál daudaun ne’e ne’ebé povu moris hela iha situasuan Estadu Emerjensia no Serka Sanitária ba COVID-19, iha implikasaun ba ema-nia moris, ne’ebé balun moris simu situasuan ne’e no balun la simu, entaun ikus mai mosu akontesimentu hirak ne’e.

“Kazu sira-ne’ebé akontese iha territoriu Oé-Cusse mak ida iha Aosnak, aldeia Bausiu, suku Nipani, sub-rejiaun Pante Makasar. Ida iha suku Lela-Ufe, sub-rejiaun Nitibe no foin daudaun ida iha suku Abani, aldeia Haemnanu, sub-rejiaun Pante Makasar. Polísia Nasionál liuhosi servisu investigasaun identifika no relata hotu ba iha tribunál no ikusliu desizaun ne’e ha’u foin simu suspeitu rua sei asegura no ida kumpre primeiru interogatóriu iha prizaun Becora,” nia dehan.

Tanba ne’e, nu’udár komandante PNTL apela ba komunidade atu servisu hamutuk ho membru PNTL destaka ona iha Ofisiaís Polisia Suku (OPS) iha suku sira, ne’ebé reprezenta seguransa hosi vila ba iha área remota atu fó seguransa no asegura konflitu ne’ebé akontese ba komunidade iha baze,

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here