Família vitima masakre setembru negro 1999 iha Suai tau ai-funan no sunu-lilin iha monumentu masakre negro, 06 setembru 2021. Imajen Tatoli/Celestina Teles

COVALIMA, 06 setembru 2021 (TATOLI)-Família vítima hosi masakre setembru negro, 06 setembru 1999, ohin,  tau ai-funan no sunu-lilin   iha monumentu setembru negro iha Covalima.

Notísia Relevante : Rodolfo: “Milísia sira oho no sunu ha’u nia fen ho oan”

“Ohin,  ami mai tau ai-funan no sunu-lilin la’ós organiza husi Governu, maibé família vítima sira ho  konsiénsia rasik hodi selebra loron masakre setembru negro  1999,” Francisco de Andrade hateten ba jornalista sira.

Masakre setembru negro 1999  sai hanesan istória  nakukun ba komunidade iha Covalima. Tanba ne’e bainhira atu selebra loron refere, lá presiza atu konvida komunidade sira, maibé komunidade no família vítima sira iha konsiensia rasik hodi selebra loron istóriku ida-ne’e.

Hafoin família masakre setembru negro 1999 hamutuk ho komunidade no funsionáriu sira iha Munisípiu Covalima tau ai-funan, funsionáriu sira kontinua hala’o servisu hanesan baibain.

iha sorin seluk, sasin moris  hosi masakre setembru negro 1999, Rodolfo da Cruz “Samasesu”, hateten família hosi masakre setembru negro 1999 hanesan memória nakukun no kruél.

“Ami família kontinua husu misa no tau ai-funan iha monumentu setembru negro 1999, família sira ne’ebé mate la’ós tanba sira-nia interese maibé mate tanba rai ida-ne’e nia independénsia,” Rodolfo dehan.

Masakre setembru negro 1999 lansa hosi  milísia  pro-autonomia sira hodi oho Padre na’in tolu  hamutuk ho sarani sira lubun iha Igreja Ave Maria, Suai-Covalima iha tinan 1999.

Jornalista   : Celestina Teles

Editór         : Francisco Simões

 

HAKEREK NO HATÁN

Please enter your comment!
Please enter your name here