Administradór Munisípiu Aileu, Abel da Conceição. Imajen/Espesiál.

DILI, 06 setembru 2021 (TATOLI)—Administradór Munisípiu Aileu, Abél da Conceição, hateten ekipa téknika Ministériu Administrasaun Estatál (MAE), segunda (06/09) ne’e rekolla informasaun kona-ba prosedimentu no halo avaliasaun servisu iha Aileu.

Notísia Relevante: Lei poder lokál no desentralizasaun administrativa hanesan lei ne’ebé importante

Administradór ne’e hatutan ekipa téknika MAE nian rekolla informasaun sira hanesan prosedimentu servisu durante iha Munisípiu Aileu nian no halo avaliasaun ba servisu ne’ebé kada munisípiu hala’o, karik servisu sira-ne’e di’ak no tuir duni orientasaun ka regra ne’ebé iha mak munisípiu ne’e sei ultrapasa ba Administrativa Direita Estadu nian.

“Iha rekollamentu informasaun ba prosedimentu servisu ne’e, karik Munisípiu Aileu inklui Ermera no Liquiça mak preénxe duni kritériu mak ita-nia Governu deside no sei hakat ba Administrativa Direita Estadu nian,” Abél da Conceição hateten ba Agência TATOLI, liuhosi telefónika, segunda ne’e.

Entretantu, Diretór Jerál Desentralizasaun Administrativa Ministériu Administrasaun Estatál (MAE), Belarmino Filomeno Nevws, hateten Polítika Desentralizasaun Administrativa ne’e, antes ne’e Governu anteriór inísia ho Lei Poder Lokál atu hahú prosesu desentralizasaun maibé Prezidente da Repúblika veta iha setembru 2017 tanba duvida ho kontrolu Governu sentrál bele lakon tiha ba Administradór sira.

Nia hateten, Governu sentrál harii poder lokál ida-ne’ebe mak bazea ba baze fundamentál ida mak tenke iha lei poder lokál, tanba lei poder lokál hatuur ona iha konstituisaun RDTL, iha artigu 72 ko’alia kona-ba estabelesementu poder lokál.

“Bainhira ita harii poder lokál ne’e tenke iha nia baze legál fundamentál atu ita hatuur nia sistema ida, atu oinsá iha servisu internál ne’e iha prezidente, iha adjuntu no sekretária depois estrutura iha poder lokál ne’e oinsá,” nia dehan.

Bainhira husu kona-bá prestasaun servisu Administradór Munisípiu Aileu nian, nia akresenta, bainhira nia asume kargu hanesan Adminiatradór Munisípiu Aileu, iha koordenasaun no kooperasaun ho parte hotu la’o di’ak, tanba hanesan dezastre naturál ne’ebé akontese iha 04 abríl ne’e hetan ona atendementu di’ak no konsege rezolve duni ponte no estrada entre postu ida ba postu seluk hosi Inspesaun Jerál Estadu (IJE).

“Komunidade afetadu sira mós hetan ona apoiu hosi ita-nia Governu,” nia dehan.

Iha konstituisaun RDTL artigu 72 kona-bá “Podér Lokál” númeru 1 hateten, sei harii kbiit lokál ho ema ne’ebé koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun ida-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeta partisipasaun Estadu nian.

Iha númeru 2 haktuir, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here