Diretór Transporte Terrestre Baucau, Roberto da Cruz. Imajen TATOLI/Natalino Belo

BAUCAU, 06 setembru 2021 (TATOLI)–Diresaun Transporte Terreste (DTT) Baucau rekolla reseita ba kofre Estadu hamutuk $11.717,50 liuhosi atendimentu trata dokumentu veíkulu no lisensa kondusaun.

“Iha fulan-agostu, ami konsege rekolla reseita hamutuk $11.717,50 ba kofre Estadu liuhosi kliente hamutuk na’in-959 ne’ebé mai trata dokumentu, ne’ebé númeru ne’e tun tanba aplika serka sanitária, kompara ho trimestre daruak konsege rekolla reseita $23.145,” Diretór Transporte Terrestre Baucau, Roberto da Cruz, hateten, iha ninia knaar fatin, Villa nova, segunda ne’e.

Reseita hirak ne’e rekolla hosi trata dokumentu hamutuk 95 ho orsamentu $1.959,50, lisensa transporte 65 ho osan $2.740, lisensa karta kondusaun 100 ho orsamentu $1.625, no inspesaun hamutuk 699 ho osan $6.200.

Tuir tarifa trata karta kondusaun ho prazu tinan-rua, tenke selu osan administrasaun hamutuk $15 no tinan-lima $20, ba lisensa kondusaun $10, renovasaun karta inspesaun veíkulu $10, lisensa kondusaun lakon tenke multa $15.

Tuir nia, reseita ba setembru ne’e seidauk iha relatóriu tanba munisípiu Baucau mós aplika serka sanitária.

“Ami-nia atedimentu kontinua la’o normál iha ámbitu serka sanitária, maibé kumpre nafatin regra protokolu saúde hanesan fase liman, distánsia sosiál no uza máskara,” nia akresenta.

Kona-ba sinál trázitu iha Baucau, Dirijente ne’e dehan, nia parte hato’o ona pedidu ba nível nasionál liuhosi Ministériu Transporte no Telekomunikasaun (MTK), maibé seidauk responde tanba kestaun orsamentu.

“Ami kada tinan hato’o ba nasionál,maibé  nia resposta maka orsamentu fahe la to’o tanba ne’e ami kontinua hein,” Roberto hatutan.

Aleinde ne’e, DTT Baucau mós halo ona kooperasaun serbisu ho Polísia Nasionál Timor-Leste (PNTL) liuhosi Diresaun Tránzitu Munisisipál atu halo inspesaun hodi prevene asidente trafégu.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here