Diretór Servisu Saúde Baucau, Domingos Reinaldo da Costa Guterres. Imajen TATOLI/Natalino Belo

BAUCAU, 06 setembru 2021 (TATOLI)–Diretór Servisu Saúde Baucau, Domingos Reinaldo da Costa Guterres, husu komunidade ne’ebé iha sintoma COVID-19 atu kolabora ho parte kompetente hodi halo tratamentu, nune’e bele evita risku propagasaun maka’as liután.

“Atu dehan loloos ita tama transmisaun komunitária, tanba ne’e importante ita prevene família labele afeta to’o mate, ita hotu esforsu hodi kazu ne’e labele aumenta barak liután, tanba ne’e ema ne’ebé iha sintoma tenki voluntáriumente halo tratamentu nune’e bainhira pozitivu bele izola-an ba fatin ne’ebé Governu prepara ona,” Diretór ne’e hateten iha ninia knaar fatin, Ria-mare, Villa antiga, segunda ne’e.

Servisu Saúde nafatin fó prioridade ba prevensaun, nune’e bele redús taxa mortalidade liuhosi mekanizmu sensibilizasaun, kolabora ho autoridade lokál hanesan xefe suku no aldeia, inklui líder hosi elementu hotu atu fó motivasaun ba komunidade hodi prevene transmisaun surtu COVID-19 iha Baucau.

“Ita sempre ko’alia, agora depende ba konsiénsia, dalabarak halo servisu barak to’o haluha prevene-an, maibé ita nafatin fahe informasaun no ita hotu servisu hamutuk fahe informasaun ba ema hotu komprende,” nia akresenta.

Tuir dadus atuál, kazu ativu ne’ebé daudaun iha sentru izolamentu hamutuk 215, kompostu hosi mane 139 no feto 76, ne’ebé koloka iha izolamentu haat hanesan Jináziu na’in-64, Casa das Cores na’in-20, eis SPK na’in-41 no Ria-mare na’in-30 no auto-karantina na’in-50.

Hosi kazu refere inklui mós pesóal saúde na’in-27 hosi Hospital Referal Eduardo Ximenes (HorEX).

To’o domingu (05/09), Baucau ne’ebé klasifikadu hanesan transmisaun komunitária deteta pozitivu COVID-19 hamutuk na’in-30, óbitu ida hanesan bebe mane fulan-10, no kazu rejistadu hamutuk 382.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here