Diretór Ezekutivu ANAAA, Edmundo Viegas. Imajen Tatoli/Nelia Fernandes.

DILI, 06 setembru 2021 (TATOLI) – Ajénsia Nasionál Avaliasaun Akreditasaun Akadémiku (ANAAA), ohin, reavalia fali kursu Edukasaun Fízika Desportu (EFD) iha Fakuldade Edukasaun Arte Humanióra (FEAH) Universidade Nasionál Timor Lorosa’e (UNTL) tanba kursu ne’e la prienxe rekizitu iha avaliasaun dahuluk.

Diretór Ezekutivu ANAAA, Edmundo Viegas dehan, ohin no aban ekipa avaliadór ANAAA nian kompostu hosi avaliadór nasionál no internasionál-sira sei kontinua reavaliasaun kursu Edukasaun Fízika Desportu (EFD) ba daruak tanba kursu ne’e la hetan akreditasaun iha tinan rua ba kotuk.

Ba Agência Tatoli, segunda ne’e, hosi telefónika, Edmundo Viegas hateten reavaliasaun daruak ne’e atu lori kursu ne’e bá akreditasaun. Maibé kuandu la pasa ba daruak tenke para no la bele kontinua.

“Ita seidauk hatene tanba ekipa avaliadór sira se reavalia hela kuandu hotu tiha sira sei hato’o relatóriu mai lai maka ita foin hatene,” Edmundo Viegas hateten.

Vise-Dekanu Fakuldade Edukasaun Arte Humaniora (VDFEAH), Elvis Fernades Britis da Cruz, garante katak avaliasaun dahuluk sira enfrenta difikuldade tanba laiha preparasaun ida atu garante kursu edukasaun fízika desportu ne’e. Ne’ebé kursu ne’e mosu hosi parte rekursu umanu. Maibé agora kursu ne’e iha ona mudansa atu responde dezafiu sira ne’ebé mak ANAAA propoin.

“Ita iha espektasaun katak reavaliasaun dala ikus ne’e ita bele hakat sai tiha hosi dezafiu ne’ebé mak ita enfrenta durante ne’e. Ha’u iha espektasaun tanba agora ami iha mudansa bainhira dekana FEAH halo lobby maka’as ho parte Sekretáriu Estadu Juventude no Desportu hodi hetan apoiu rekursu umanu ida adekuadu,” nia hateten.

FEAH liuliu kursu EFD iha ona ninia rekursu umanu hamutuk na’in-13, dosente kualifikadu na’in-13, kompostu hosi dosente internasionál hosi Cuba na’in-hitu (7) no dosente timoroan kualifikadu na’in-neen (6) ho formasaun doutoramentu  na’in-ida (1), postu graduasaun  na’in-ida (1) no mestradu na’in-haat (4) maka sei reforsa kursu EFD ba futuru.

Jornalista : Tomé Amado

Editór       : Francisco Simões

 

HAKEREK NO HATÁN

Please enter your comment!
Please enter your name here