Ilustrasaun Loron Mundiál Literásia. Imajen/Espesiál.

DILI, 06 setembru 2021 (TATOLI)—Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, informa AHDMTL sei selebra Loron Mundiál Literásia ka International Literacy Day (ILD) iha Munisípiu Liquiça.

Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

“Iha loron 8 setembru ne’e, ita sei selebra loron analfabetu (buta huruf) ka loron mundiál literásia iha Liquiça tanba iha Timor-Leste ne’e, ema ho defisiénsia sira barak mak sei hela ho analfabetizasaun,” Gaspar Afonso hateten ba Agência TATOLI, liuhosi telefónika, segunda ne’e.

Iha selebrasaun loron mundiál literásia ne’e, membru Governu sira sei la partisipa tanba konfinamentu obrigatóriu, maibé serimónia ne’e sei partisipa hosi Autoridade Munisípiu Liquiça, Administradór Postu, inklui Xefe Suku no Xefe aldeia sira nomós populasaun sira.

Serimónia ne’e sei apoiu hosi Organizasaun Civil Society Education Partnership (CSEP), Forum Juventude Marjinadu (FJM) ne’ebé apoiu finanseiru ho montante $1.100.

Loron mundiál literásia ne’e, AHDMTL foin selebra dahuluk iha Timor-Leste tanba liuhosi serimónia ne’e ema hotu hatene katak ema defisiénsia iha Timor-Leste mós barak mak sei analfabetu hela.

“Iha selebraaun ne’e, partisipante hotu-hotu sei nafatin kumpre regra ne’ebé mak Governu estabelese nanis ona,” nia dehan.

Istória Loron Mundiál Literásia

Selebrasaun loron mundiál literásia ne’e akontese bainhira hala’o konferénsia kona-bá “Kombate Analfabetu” iha Teheran, Iraun, iha loron 08-19 setembru 1965.

Konferénsia ne’e hala’o tanba atu konkretiza kompromisu no apela ba populasaun sira iha mundu tomak atu tau iha konsiénsia hodi kombate analfabetu iha mundu.

Hahú hosi selebra Loron Mundiál Literásia ba tinan dahuluk, iha tinan 1966, kada tinan mundu tomak halo selebrasaun ba loron refere, hanesan asaun konkreta hodi dezenvolve ajenda kona-bá literásia iha nível mundiál, rejionál, no nasionál.

Bazea ba dadus hosi UNICEF, maske iha avansu, dezafiu no problema literásia iha mundu tomak ne’e iha nafatin. Tuir dadus, maizumenus ema adultu sira iha mundu tomak hamutuk juta 773 mak sei enfrenta menus abilidade literásia no literásia bázika.

Literásia bázika ne’e rasik mak hanesan literásia lee no hakerek, finansiál, númersia, dijitál no selu-seluk tán. Ema ne’ebé enfrenta menus literásia bázika ne’e hatudu katak ema ne’e menus kapasidade ka la komprende kona-bá literásia hirak ne’e.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here