Vítima Luís Maria ho idade 47 ne’ebé hetan sona ho tudik dala haat hosi suspeitu RA ho idade 20, iha suku Uma Uain Leten, postu administrativu Viqueque Villa, munisípiu Viqueque, domingu (05/09/21). Imajen Tatoli/ Vitorino Lopes da Costa.

VIQUEQUE, 06 Setembru 2021 2021 (TATOLI)—Vítima Luís Maria ho idade 47 hetan sona ho tudik dala haat hosi suspeitu RA ho idade 20, tanba abuza-malu iha suku Uma Uain Leten, postu administrativu Viqueque Villa, munisípiu Viqueque, iha domingu 05 setembru tuku 22:19.

Bainhira hetan keixa hosi autoridade lokál, Komandu Polísia Nasionál Timor-Leste (PNTL), munisípiu Viqueque orienta kedan membru-sira hodi halo detensaun ba suspeitu RA, ne’ebé oras-ne’e tenke kumpre oras 72 iha sela detensaun komandu Viqueque.

Notísia relevante:MEJD hahú introdús planu reabilitasaun eskola iha Viqueque

“Suspeitu iha ona sela atu polísia halo indentifikasaun no sei aprezenta kazu ne’e  ba Munistériu Públiku (MP),”  Komandante PNTL, Munisípiu Viqueque, Superintendente, Sebastião Alves Quintão, hateten ba jornalista, iha segunda ne’e.

Superintendente, Sebastião Alves Quintão  konta-tuir kronolojia katak, informasaun ne’ebé parte PNTL hetan hosi parte família, katak, akontesimentu ne’e mai-hosi labarik ho labarik mak abuza-malu, ikus-mai família balun hosi parte labarik balun mak la satisfas, nune’e espresa liu hosi asaun krime.

Tanba ne’e, oras ne’e daudaun prosesu la’o hela no parte polisia sei buka atu deskobre verasidade hosi kazu ne’e.

Nune’e  mós médiku internamentu, Hermenegildo Pereira, haktuir, vítima Luis Maria maski hetan sona ho tudik dala haat, maibé hafoin halo observasaun iha sentru saúde, ninia kondisaun di’ak hela no oras ne’e sei kontinua hetan tratamentu iha sala emerjénsia.

Iha ezame médiku hatudu katak, vitima hetan sona parte haat, primeiru iha parte matan fukun hosi parte loos tudik tama 1.5cm, segundu sona iha kabun parte karuk ladún kle’an, terseiru sona iha kotuk laran ho ninia kle’an 2cm, no kuartu maka sona iha kalilin parte karuk ho kle’an 1cm.

Maski nune’e, médiku sira hala’o ona tratamentu intensivu no tuir planu sei kontinua baixa loron ida tan bele alta ona.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here