Loron Konsulta Popular, 30 agostu 1999, populasaun sira forma ba sentru votasun hodi deside Timor-Leste nia destinu liuhosi sira-nia votu. Imajen/Dok.Espesiál.

BAUCAU, 05 setembru 2021 (TATOLI) – Sentru Teatru Filme Tebeda’e (Filteda), Munisípiu Baucau, iha Postu Administrativu Baguia, aprezenta teatru konsulta populár, 30 agostu 1999 ho títulu monumentu referendu no hanoin hikas rezultadu konsulta populár ne’ebé anúnsiu hosi Sekretáriu Jerál Nasoins Unidas (SJ-ONU) tempu ne’ebá, Kofi Annan, iha loron  4 setembru 1999.

“Drama Konsulta Populár nu’udar drama realizmu ne’ebé lori duni istória Timor
loron konsulta populár iha tinan 1999 mai aprezenta iha tinan 2021 ne’e. Mézmu
la kompletu, maibé ami foti liu mak klima hosi istória ida-ne’e mak prosesu ba
votasaun, hatudu servisu ONU nian iha Timor-Leste tinan 1999 no fó sai rezultadu eleisaun hosi Kofi Annan iha tempo ne’ebá,” realizadór teatru Filteda, Silvano Rodrigues, informa ba Agência Tatoli iha ninia knar fatin, domingu  ne’e.

Silvano hatutan, aprezentasaun teatru ne’e hanesan parte proposta ida ba Governu liu-liu Ministériu Turizmu no Ministériu Edukasaun Juventude no Desportu (MEJD) diresaun arte no kultura atu tau hanoin no polítika hamutuk no aloka orsamentu hodi harii monumentu
referendu iha Timor laran tomak.

“Monumentu referendu nu’udar memória ne’ebé sei sai fatin turístiku no matéria istória Timor-Leste ba jerasaun foun sira,” nia tenik.

Hosi aprezentasaun drama refere atrai komunidade liuliu ferik no katuas sira hodi espresa sira-nia sentimentu triste kahur ho kontente tanba hanoin hikas momentu istóriku iha tinan 1999.

Ekipa teatru ne’ebé aprezenta drama hamutuk nain 30 kompostu husi crew nain ualu no artista 22.

Jornalista   : Natalino Belo

Editora       : Francisco Simões

HAKEREK NO HATÁN

Please enter your comment!
Please enter your name here