Ministru Prezidénsia Konsellu Ministru, Fidelis Manuel Leite Magalhães no Ministra Saúde, Odete Maria Freitas Belo hamutuk ho Reprezentante OMS iha Timor-Leste, Arvind Mathur. Imajen TATOLI/Egas Cristóvão.

DILI, 04 setembru 2021 (TATOLI)—Ministru Prezidênsia Konsellu Ministru, Fidelis Manuel Leite Magalhães, hateten razaun Governu impoin hikas konfinamentu obrigatóriu jerál iha munisípiu Dili tanba númeru transmisaun infetadu COVID-19 no númeru óbitu (mate) sa’e maka’as, no variante Delta tama ona iha Timór-Leste.

Governu kontinua husu ba populasaun hotu-hotu atu kumpre medida prevensaun kontra surtu COVID-19 iha Timor-Leste, tanba konfinamentu obrigatóriu ne’e atu evita movimentasaun ema-nian ba-mai, nune’e bele salva sidadaun sira hosi COVID-19.

Notísia Relevante: Konfinamentu domisiliáriu Dili mantein to’o 09 setembru, hakotu iha Ermera

“Husu kompreensaun no hamutuk ho Ministériu Saúde no apoiu hosi OMS atu ita hotu servisu hamutuk. Se hakarak livre sedu liu kumpre medida prevensaun sira, tenke ba vasina, distansiamentu sosiál no hela iha uma. Kuandu moras ne’e lahada’et ona, Governu bele liberta lalais,” Fidelis Manuel Leite Magalhães, hateten liuhosi konferénsia imprensa konjunta ho Ministériu Saúde (MS) no Organizasaun Mundiál Saúde (OMS) ne’ebé realiza iha salaun Ministériu Finansa, Aitarak-laran, Dili, sábadu ne’e.

Governu mós hakarak ukun povu ida-ne’ebé haksolok hodi halo atividade ekonómiku loro-loron, tanba Governu la manan buat ida se Governu hakarak ‘politiza’ COVID-19 tanba COVID-19 ne’e ejiste duni iha Timor-Leste.

“Tan ne’e mak Governu tenke foti medida sira hodi prevene ninia povu hosi pandemia ne’e,” Fidelis hateten.

Portavóz Governu ne’e salienta, Konsellu Ministru ne’e órgaun ida-ne’ebé hola desizaun no órgaun ne’ebé mak aas liu Governu nian ne’ebé xefia hosi Primeiru-Ministru, tanba iha prosesu halo diskusaun sira-ne’ebé nia rasik jere no sempre sura ho argumentu, diskusaun, diskordansia no debate kle’an entre proponente no membru Governu sira seluk.

“Bainhira foti ona desizaun ne’e mak desizaun Governu hotu nian. Tanbasá mak Governu tenke foti desizaun susar ida-ne’e hodi impoin konfinamentu obrigatóriu. Tanba atu salva ninia ema-nia vida. Tanba ne’e, husu ba inan-aman sira atu hakat ba postu vasina sira hodi vasina. Labele rona informasaun falsa sira-ne’ebé espalla iha fatin-fatin. Ema sira-ne’ebé espalla informasaun falsa ne’e, bainhira sira moras bele selu aviaun ba halo tratamentu iha iha rai-li’ur, maibé povu baibain ne’ebé tenke depende ba sistema saúde ne’e,” nia dehan.

Ministra Saúde, Odete Maria Freitas Belo, nafatin enkoraza sidadaun sira-ne’ebé seidauk vasina bele hakbesik-aan ba postu vasina atu bele vasina, maske vasina la 100% prevene surtu COVID-19 maibé hamenus risku transmisaun no moras grave sira.

Daudaun ne’e, Timor-Leste rejista ona kazu Delta COVID-19 ne’ebé mak ninia transmisaun ne’e lais no maka’as tebes kompara ho COVID-19 baibain.

Biban ne’e, Governu foti desizaun hodi impoin hikas konfinamentu obrigatóriu iha Dili nu’udar estratejia foun Governu nian atu proteje ninia sidadaun hosi virus variante Delta COVID-19 ne’e.

“Governu labele mantein ho estratejia antes tanba situasaun transmisaun virus Delta ne’e barak ona, tanba ne’e Governu tenke muda estratejia hodi aplika hikas konfinamentu obrigatóriu. Ema hotu-hotu protesta maibé Governu mantein ho ninia pozisaun hodi proteje sidadaun, tanba iha ami-nia parte saúde ninian fasilidade sira la sufisiente ona. Tanba, kama sira iha sala izolamentu Vera Crus no Lahane ne’e moras sira toba nakonu iha laran,” nia haktuir.

Reprezentante Organizasaun Mundiál Saúde (OMS) iha Timor-Leste, Arvind Mathur, apoia desizaun Governu hodi preteje ninia sidadaun liuhosi konfinamentu obrigatóriu, maske desizaun ne’e lafasil.

“Iha fulan-agostu ne’e, rejista kazu 6.000 no rejista mós óbitu (mate). Haree hosi amostra sira-ne’ebé mak analiza ona katak iha variante Delta ne’ebé mak daet lalais iha ita-nia rain,” Arvind Mathur hateten.

Tanba ne’e, nia enkoraza sidadaun sira tenke ba simu vasina tanba maske taxa vasinasaun nian kontinua sa’e, infesaun mós mosu, ida-ne’e impaktu mai hosi indixiplina populasaun nian ne’ebé lakumpre medida prevensaun sira.

OMS rekomenda, bainhira Governu kontinua hasa’e taxa vasina mak bele redús tasa infesaun sira tanba vasina ba sidadaun sira-ne’e mak efetivu no efikasia hodi kontra variante foun sira.

“OMS komprometidu servisu hamutuk no apoia Governu hodi kombate surtu COVID-19 iha Timor-Leste,” Arvind Mathur hateten.

Notísia Relevante: COVID-19, pozitivu 169 no ativu 4.429

Jornalista : Antónia Gusmão

Editór       : Cancio Ximenes

HAKEREK NO HATÁN

Please enter your comment!
Please enter your name here