Vise-Prezidente Partidu FRETILIN, Francisco Miranda Branco no Adjuntu Sekretáriu Jerál Flavio da Silva, realiza konferénsia imprensa kona-ba loron anunsiu rezultadu Konsulta Popular, 40 setembru 1991, iha salaun sede partidu FRETILIN, sábadu (04/09). Imajen Tatoli/Francisco Sony.

DILI, 04 setembru 2021 (TATOLI)—Vise-Prezidente Partidu Frente Revolusionária Timor-Leste Indpendente (FRETILIN, sigla portugés), Francisco Miranda Branco hateten, loron 04 setembru nu’udar loron importante tanba Sekretariu Jerál Nasaun Unida, Kofi Annan, anunsia rezultadu konsulta populár ne’ebé povu tomak ezerse sira-nia votu hodi deside Timor-Leste nia destinu.

Notísia Relevante: Presiza valoriza loron 04 setembru

Vise-Prezidente FRETILIN ne’e husu entidade hotu atu halo reflesaun, tanba povu Timor-Leste tomak ezerse sira-nia votu hodi reafirma vontade povu nian iha 28 novembru 1975, unilateralmente FRETILIN proklama Timor-Leste nia independénsia.

“Loron ida ohin, loron impotante ne’ebé fó lisaun ba ita hotu patriota nasionalista povu Timor-Leste tomak, atu ita halo reflesaun. Reflesaun nu’udar povu, nu’udar Estadu ba saida mak ita deside tiha ona no deside hamutuk liberta ita-nia rain hosi kolonialista sira,” Francisco Miranda Branco hateten liuhosi konferénsia imprensa iha ambitu reflesaun loron 04 setembru 1999 ne’ebé hala’o iha sede Komite Sentál Fretilin (CCF, sigla portugés) Comoro, Dili, sábadu ne’e.

Iha prosesu konstrusaun Estadu ne’e, nia husu, timor-oan hamutuk iha diferensa nia laran maibé ho objetivu komun ida de’it atu liberta povu hosi ki’ak, moras no atraza hodi hatuur povu hanesan iha nivél ida de’it ho povu seluk iha mundu tomak.

Tanba ne’e, Freilin husu presiza ema hotu-hotu atu halo reflesaun iha prosesu konstrusaun ida-ne’e, nune’e bele haree hamutuk frakeza no limitasaun sira durante ne’e atu bele aselera.

“Liu tiha tinan 20 ita kaer kuda talin rai ne’e nian, ita sei halerik ba bee-moos, númeiru ki’ak 40%  to’o 50% sei iha. Ita seidauk auto-sufisiente atu prodús nesesidade bázika, atu fó han ita-nia aan rasik no ita dependente ba rai-li’ur,” nia dehan.

Tanba ne’e, nia husu Governu tenke kria polítika di’ak ida ba setór agrikultura nian atu buka merkadu ba produsaun produtu ne’ebé populasaun sira prodús, no labele halo populasaun prodús tiha hafoin husik hela nune’e de’it.

Vise-Prezidente Partidu Fretilin ne’e husu atu Estadu no Governu halo revizaun ba Planu Estatejiku Dezenolvimentu Nasionál 2011-2030, tanba   iha implementasaun ne’e tau sees tiha hodi la kumpre definisaun sira-ne’ebé define iha plau estratejiku ne’e nia laran.

“Ita haree deit iha setór agrikultura laiha avansu. Setór saneamentu kuaze ke laiha avansu. Tuir planu, iha 2015 ne’e, sistema bee-moos tama ema nia-uma maibé agora ema mak buka bee-moos. Presiza halo revizaun ba planu estratejiku dezenvolvimentu nasionál hodi bele atualiza fali,” nia hateten.

Sentru votasaun ba Konsulta Popular 30 agostu 1999 hamutuk 200 mak UNAMET estabelese iha Timor-Leste laran tomak. Totál populasaun Timor-Leste ne’ebé rejistu atu ezerse sira-nia votu hamutuk 451.792 no hosi totál ne’e 98.5% mak ba vota, no rezultadu votasaun ne’’e populasaun Timor-Leste hili deside haketak-aan hosi Indonézia 94.388 no hirak ne’ebé hili autonomia hamutuk 344.580.

Iha loron 04 setembru 1999, iha tuku 09:00 dadeer, Xefe UNAMET iha Timor-Leste, Ian Martin, lee rezultadu konsulta populár iha Hotel Mahakota (atuál Hotel Timor) ne’ebé 21,5% hosi populasaun Timor-Leste hili pakote autonomia espesiál, enkuantu 78,5% hili atu haketak-aan hosi Indonézia (ukun rasik aan).

Tuir istória no faktu, rezultadu Konsulta Populár (Referendu) loloos fó sai iha 07 setembru 1999, maibé haree ba situasaun violénsia ne’ebé akontese maka’as iha Timor-Leste mak rezultadu ne’e fó sai fali iha 04 setembru 1999.

Notísia Relevante: Rezultadu Referendu 1999: Timoroan 344.580 Rejeita Autonomia

Jornalista : Natalino Costa

Editór       : Cancio Ximenes

HAKEREK NO HATÁN

Please enter your comment!
Please enter your name here