Aktividade traballador sira iha Ponte Kais Dili bainhira hatuun foos hosi Ro tula ba Kamioneta hodi lori ba hatama iha kompania nia armajen. Imajen/Antonio Goncalves.

DILI, 04 setembru 2021 (TATOLI)—Ministériu Koordenadór Asuntu Ekonómiku liuhosi Sentru Lojístiku Nasionál (CLN, sigla portugés) apoia foos tonelada 2.000 ba Ministériu Solidariedade Sosiál (MSSI) hodi atribui ba grupu vulnerável iha ámbitu konfinamentu obrigatóriu jerál iha munisípiu Dili, ligadu ho prevensaun surtu COVID-19 iha Timor-Leste.

Diretór Jerál MSSI, Rui Manuel Gago Exposto, hateten MSSI simu apoia foos hosi CLN atu ajuda grupu vulnerável sira no tuir planu segunda (06/09) transporta ona foos iha armazen CLN nian iha Tibar mai armazen Bebora hafoin organiza ba implementasaun.

“MKAE liuhosi CLN fasilita tan foos tonelada 2.000 ba MSSI atu atende grupu vulnerável sira. Ami agora organiza hela tanba ita atu ba Tibar de’it mós tenke hetan autorizasaun hosi Sala Situasaun Sentru Integadu Jestaun krize (CIGC, sigla portugés),” Diretór Jerál MSSI ne’e hateten ba Jornalista-sira iha Ministériu Finansa, Aitarak-laran, sábadu ne’e.

Nia hatutan, iha implementasaun konfinamentu obrigatóriu iha Dili, MSSI iha hanoin ona atu fó apoia ba grupu vulnerável sira maibé sei diskute hamutuk ho CIGC atu nune’e labele implika fali situasaun.

“Loos duni katak konfinamentu obrigatóriu implementa ona semana ida no estende tan ona semana ida to’o loron-09 fulan ne’e. Atu fó apoiu ba grupu vulnerável sira, MSSI tenke serbisu hamutuk ho CIGC ligadu ho lojistiku ne’ebé depois ami halo diskusaun, tanba ami lakohi foti risku katak Governu deside konfinamentu ita ba halibur fali ema mós ladun di’ak. Ne’ebé, atu implementa ne’e, ami sei diskute hamutuk,” nia esklarese.

Antes ne’e, Portavoz Governu no Ministru Prezidénsia Konsellu Ministru, Fidelis Manuel Leite Magalhães, hateten Governu implementa ona medida ho modalidade oioin, hanesan iha tinan 2020 apoa umanitáriu, aihan no intervensaun emerjénsia sira.

“Governu iha dalan barak oinsá atu apoia sidadaun-sira. Kona-ba vida loro-loron sidadaun nian, Ministériu relevante sira iha kna’ar importante atu hatene didi’ak pontu situasaun para bele hola desizaun sira hodi fó apoia ba ita-nia sidadaun sira. Ministériu prinsipál sira mak MKAE, MTKI, no MSSI mak hala’o kna’ar órganika atu bele hola medida sira, nune’e bele halo kma’an todan hirak ne’ebé sidadaun sira hasoru hela,” nia dehan.

Jornalista : Antónia Gusmão

Editór      : Cancio Ximenes

HAKEREK NO HATÁN

Please enter your comment!
Please enter your name here