Formandu Sentru Treinamentu Vokasionál Juventude (STVJ, sigla portugés) Gleno, iha área hortikultura hala’o hela prátika. Imajen/Espesiál.

DILI03 setembru 2021 (TATOLI)—Diretór Sentru Treinamentu Vokasionál Juventude (CTVJ, sigla portugés) Gleno, Carolino Alves, hateten Governu liuhosi reuniaun Konsellu Ministru ne’ebé deside hakotu konfinamentu obrigatóriu jerál iha Ermera, mak sentru ne’e deside atu reativa atividade formasaun iha fulan setembru nia klaran.

Notísia Relevante: Konfinamentu domisiliáriu Dili mantein to’o 09 setembru, hakotu iha Ermera

“Ami-nia planu atu reativa formasaun iha fulan-setembru nia klaran. Maibé ami mós sei hein ami-nia formandu no formadór sira kompleta ona vasina, entaun ami bele hahú ona atividade formasaun,” Carolino Alves hateten ba Agência Tatoli, liuhosi telefónika, sesta ne’e.

Antes ne’e, atividade formasaun hahú iha fulan marsu maibé suspende tiha iha fulan-jullu, tanba Governu implementa konfinamentu obrigatóriu jerál iha Munisípiu Ermera entaun formasaun ne’e paraduu tiha,

Formandu sira iha Sentru Treinamentu Vokasionál Juventude (STVJ, sigla portugés) Gleno. Imajen/Espesiál.

Bainhira atu hahú fali atividade formasaun, responsavél sentru ne’e sei fó sai anúnsiu liuhosi Rádiu Komunidade Kafé, rede sosiál (facebook) STVJ Gleno nian, no mós sei kontaktu direta ba ba formandu ida-idak ninia númeru kontaktu.

“Bainhira ami reativa atividade formasaun mak ami kumpre nafatin regra prevensaun COVID-19 hosi Ministériu Saúde (MS) no Organizasaun Saúde Mundiál (OMS) hodi fase liman ho sabaun, uza máskara no halo distansiamentu sosiál,” nia deha.

Iha 2021 ne’e, formandu hosi juventude no estuudante sira-ne’ebé tuir formasaun hamutuk na’in-66 no hosi númeru ne’e formandu na’in-22 mak tuir formasaun kona-ba ospitalidade, administrasaun 22 no hortikultura 22.

Sentru ne’e estabelese iha 2010 ho objetivu atu fornese formasaun vokasionál ba joventude sira ne’ebé la konsege kontinua sira-nia estudu ba iha universidade.

Hosi 2010 to’o 2021, formandu hamutuk 700 mak tuir ona formasaun iha sentru ne’e hodi tuuir formasauun kona-bá ospitalidade, administrasaun no hortikultura ne’e, iha 45% mak hetan ona servisu.

Totál funsionáriu no formadór hamutuk 11, kompostu hosi funsionáriu na’in-haat (4) no formadór na’in-hitu (7).

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here