Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 03 setembru 2021 (TATOLI)–Deputadu no veteranu tinan 24, José Agostinho Siqueira “Somotxo” rejeita informasaun ne’ebé espalla hosi ema balun iha rede sosiál (facebook) atu boikota Orsamentu Jerál Estadu (OJE) 2021 iha Parlamentu Nasionál.

“Ha’u desmente informasaun ne’ebé Jerasaun FRETILIN fó sai iha facebook katak, se grupu Alkatiri ho Lú Olo la ajenda kongresu FRETILIN iha tinan ida-ne’e, grupu Somotxo sei boikota OJE 2022. Informasaun ne’e puramente bosok, sai hosi jerasaun FRETILIN, Silva Mendes Mariza ninia hanoin ho ninia kakutak, sira sei responsabiliza informasaun ne’e,” Somotxo hato’o rejeisaun ne’e ba Agência TATOLI liuhosi telefónika, kinta ne’e.

Somotxo konsidera ema ida ho ID “Silva Mendes Mariza” ne’ebé espalla informasaun ne’e krime, tanba publika ninia imajen ho informasaun falsa.

“Hakarak sai polítiku, barani mosu iha públiku tau hanoin ne’ebé nia iha, labele uza ha’u-nia naran ka helik ha’u hodi fo sai ninia opiniaun polítika ba públiku,” Prezidente Komisaun B ne’e kestiona.

Somotxo husu Polísia Sientífika Investigasaun Kriminál (PCIC-sigla portugés) tenke investiga autór ne’e, nune’e bele responsabiliza ninia atu kobarde ne’e.

“Ha’u keixa autór ne’e bainhira ita hatene loloos autór ne’e. Se ho identidade falsu fó kompeténsia ba Polísia Nasionál Investigasaun kriminál (PNSIC-sigla portugés) ho PCIC atu buka hatene loloos sé mak inventa informasaun ne’e ba públiku,” Veteranu tinan 24 ne’e hateten.

José Agostinho Siqueira “Somotxo” nu’udar deputadu hosi Bankada Frente Revolusionária Timor-Leste Independente (FRETILIN) no asume kargu Prezidente Komisaun B ne’ebé trata asuntu Negósiu Estranjeiru, Defeza no Seguransa iha Parlamentu Nasionál.

Jornalista : Evaristo Soares Martins

Editór       : Cancio Ximenes

 

HAKEREK NO HATÁN

Please enter your comment!
Please enter your name here