Prezidente Repúblika, Francisco Guterres 'Lú Olo'. Imajen Tatoli/Egas Cristovão

DILI, 03 setembru 2021 (TATOLI)—Prezidente Repúblika, FRanciso Guterres Lú Olo, konkorda fó apoiu  finanseiru karik  ema ruma mate ka hetan inkapasidade hafoin simu vasina hasoru COVID-19

Tuir komunikadu imprensa ne’ebé Agência Tatoli asesu iha sesta (02/09) ne’e haktuir, iha 02 agostu liubá, Prezidénsia Repúblika simu hosi Governu diploma ida (Dekretu-Lei) kona-ba dever Estadu nian atu fó apoiu finanseiru (indemnizasaun) ba ema vasinadu, karik mate ka hetan inkapasidade hafoin simu vasina, iha ámbitu planu nasional vasinasaun, atu prevene no kombate COVID-19.

Hanesan baibain akontese ho diploma ne’ebe de’it (Lei ka Dekretu-Lei), Prezidente Repúblika iha kbiit konstitusionál atu promulga ka veta (la asina), bele mós veta ho motivu polítiku.

Bainhira konsidera katak Lei ka Dekretu-Lei ruma la haktuir Konstituisaun RDTL, Prezidente Repúblika haruka ba Tribunal Rekursu no instánsia ida-ne’ e mak deside inkonstitusionál  ka lae.

Prezidente Repúblika la hili dalan haruka Dekretu-Lei ne’e ba Tribunal Rekursu tanba haree katak matéria ne’e monu ba iha ámbitu responsabilidade “civil  extrakontratuál” Estadu nian ne’ebé tenke hatuur ho lei ida.

Maibé, to’ o ohin loron Timor-Leste seidauk iha lejislasaun ne’ebé regula responsabilidade sivíl kontratuál Estadu nian ka entidade públika sira-nian ba ezersísiu atividade jestaun públika.

Tuir Konstituisaun RDTL haruka, Parlamentu Nasional mak iha knaar lejislativu ba matéria ida-ne’e. Parlamentu Nasional bele mós fó autorizasaun lejislativa ba Governu atu prepara lei kona-ba responsabilidade sivíl Estadu nian.  

Biar inisiativa di’ak ida, Governu la halo ho autorizasaun lejislativa Parlamentu Nasional, tanba ne’e mak Prezidente Repúblika veta Dekretu-Lei ne’e.

Prezidente Repúblika la’ ós  kontra Estadu fó  apoiu  finanseiru bainhira ekipa médika avalia no komprova katak vasina anti-Covid mak kauza ema mate ka hetan inkapasidade.

Prezidente Repúblika haruka ona mensájen ba Governu tanbasá mak la promulga Diploma ne’ e. Hein katak iha tempu badak Parlamentu Nasional mak haruka diploma ne’e ka fó autorizasaun lejislativa ba Governu hodi hato’o proposta-lei atu regula  responsabilidade sivíl Estadu nian no submete ba apresiasaun Prezidente Repúblika nian.

Jornalista : Osória Marquues

Editór       : Cancio Ximenes

HAKEREK NO HATÁN

Please enter your comment!
Please enter your name here