Komandu PNTL Dili, halo tan identifikasaun no investigasaun ba sidadaun na’in 61 ne’ebé kontra regra konfinamentu domisiliáriu jerál iha Dili, sesta (03/09/21). Imajen Tatoli/Nelson de Sousa.

DILI, 03 setembru 2021 (TATOLI)—Polísia Nasionál Timor-Leste (PNTL), liuhosi komandu munisípiu Dili, hala’o tan identifikasaun no investigasaun ba sidadaun na’in 61, kompostu hosi mane na’in 59 ho feto na’in-rua, tanba viola regra konfinamentru domisiliáriu jerál.

Ekipa konjunta komandu munisípiu, halo patrullamentu iha sesta lorokraik, mak identifika sidadaun sira-ne’e nu’ud’ar traballadór iha kompañia Bonabide Unipessoal  Lda ho kompañia Bonuk, lokaliza iha Fatumeta no Bebonuk, iha Dili, kontra rezolusaun Governu, tanba  hala’o  hela atividade  serbisu konstrusaun.

Notísia relevante:PNTL investiga ema na’in 50 viola regra konfinamentu domisiliáriu  

Segundu Komandante PNTL, munisípiu Dili, Superintendente, João Belo Sanches, hateten nafatin halo operasaun ativu no sei la tolera kualkér sidadaun mak la kumpre rezolusaun Governu.

“Lorokraik ne’e ita bolu sidadaun sira-ne’e hodi halo identifikasaun tanba kontra no la obedese ba regra konfinamentu domisiliáriu jerál. Hafoin identifikasaun, sira ida-idak sei fila-fali ba uma maibé prosesu investigasaun kontinua la’o ba Ministériu Públiku hodi lori ba Tribunál ba krime dezobediénsia,” João Belo Sanches, hateten ba jornalista-sira iha komandu PNTL, Caicoli, sesta ne’e.

Komandu munisípiu Dili mós koordena ho parte saúde halo mós teste swab ba sidadaun hirak ne’e.

Iha loron tersa 02 setembru, komandu PNTL munisípiu Dili, halo mós identifikasaun ba sidadaun na’in 50 ne’ebé kontra regra konfinamentu obrigatóriu.

Projetu rezolusaun Governu ba konfinamentu domisiliáriu jerál ba populasaun iha Dili, sita katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.

Alende ne’e, suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha serimónia ne’e.

Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.

Restaurante-sira bele fornese hahán, aplika rejime take away ka entrega iha uma de’it no estabelesimentu seluk  taka ba públiku bele dezenvolve ninia atividade liuhosi serbisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here