Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 03 setembru 2021 (TATOLI)–Vise-Prezidente Parlamentu Nasionál, Deputada Maria Angelina Lopes Sarmento, hateten Parlamentu Nasionál Timor-Leste deside partisipa konferénsia mundiál Uniaun Interparlamentár ka Inter-Parliamentary Union (IPU) iha  Áustria tanba iha vantajen barak ba parlamentu Timor-Leste nian.

Notísia Relevante: Aban, Prezidente Parlamentu Nasionál dezloka ba Áustria

“Vantajen ba ita-ne’e bele promove lasu amizade ho parlamentu rai seluk nian nomós ita bele partilla lisaun aprendida no lisaun di’ak sira-ne’ebé mak ita bele foti hosi sira liga ho sira-nia lejizlasaun, sira-nia sistema, sira-nia orsamentu, no liga ho kompeténsia parlamentu nian,” Deputada Bankada Partidu Libertasaun Populár (PLP) ne’e informa ba jornalista sira iha uma fukun, sesta ne’e.

Nia subliña, parlamentu hotu iha mundu ohin loron ne’e labele serbisu mesak, tenke halo parséria ho parlamentu rai seluk nian, entaun importante ba Timor-Leste atu promove lasu amizade no hametin kooperasaun liuhosi konferénsia mundiál IPU ne’e.

Durante konferénsia ne’e mós opurtunidade ba parlamentu Timor-Leste bele hametin kooperasaun bilaterál ho nasaun sira-ne’ebé mak halo parséria ho Timor-Leste.

Vise-Prezidente Parlamentu Nasionál ne’e hateten, nasaun sira-ne’ebé durante ne’e parséria ho Timor-Leste mós partisipa iha forum ne’e mak hanesan Cuba, Austrália, Cabo Verde, Xina no nasaun sira seluk.

Nia informa, preparasaun ba viajen ne’e hala’o dezde fulan-rua antes, maske mosu variante foun Delta COVID-19, maibé labele kansela tanba kustu billete sira depois ajendamentu ba reuniaun preparadu fulan-rua antes.

“Se ita kansela sei fó prejuizu ba kustu ne’ebé mak ita hasai ona,” nia dehan.

Nia akresenta, iha konferénsia mundiál ne’e iha nasaun 179 hosi nasaun 193 mak partisipa iha reuniaun nível altu ne’e.

Iha konferénsia ne’e iha eventu rua mak eventu dahuluk kona-ba forum Prezidente Parlamentu ne’ebé lidera hosi feto katak nasaun sira hotu ne’ebé mak Prezidente parlamentu ne’e lidera hosi feto, entaun sira-ne’e mak sei tuur hamutuk hodi partisipa feto nia partisipasaun iha parlamentu nian.

“Ha’u mós hetan konvite atu sai hanesan oradora maibé kritéria ne’e katak la’ós vise-prezidente, tenke prezidente parlamentu ne’ebé lidera hosi feto ida. Entaun, ha’u la prenxe ida-ne’e tanba ha’u nu’udar vise-prezidente,” nia hateten.

Iha loron daruak mak kona-ba konferénsia mundiál kona-ba Uniaun Interparlamentár, ne’e nível prezidente parlamentu ho deputadu sira de’it.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here