Edifisiu Tribunál Rekursu. Imajen/Espesiál

DILI, 03 setembru 2021 (TATOLI)—VIII Governu Konstitusionál realiza reuniaun Komisaun Revizaun Orsamentu Polítika (KROP) ba proposta Orsamentu Jerál Estadu (OJE) 2022 ne’ebé iha reuniaun ne’e, kada instituisaun inklui Tribunál Rekursu (TR) defende ninia proposta adisionál tuir nesesidade.

Diretór Jerál TR, Higino Soares, informa, instituisaun ne’e husu orsamentu adisionál millaun $2, hosi tetu inisiál millaun $6, ho razaun tanba alokasaun orsamentu ba kategoria menus.

“Ami mai aprezenta orsamentu KROP bazeia ba tetu orsamentu 2022 ne’ebé ami simu ona, no ami husu tan adisionál iha kategoria saláriu no vensimentu, bens no servisu, kapitál minor no kapitál dezenvolvimentu,” Diretór Jerál TR relata ba Jornalista sira, hafoin partisipa aprezentasaun Prezidente TR iha reuniaun ne’ebé realiza iha auditorium Ministériu Finansa (MF), Aitarak-laran, sesta ne’e.

Nia esplika, kategoria hirak ne’e orsamentu alokadu maibé atu reapropria ba kapitál dezenvolvimentu $900.000, bens no servisu $420.000, saláriu no vensimentu $100.000.

Enkuantu, ba kapitál dezenvolvimentu atu konstrui edifísiu foun Tribunál Distritál iha munisípiu Viqueque, Ermera no Maliana.

Adisionál ba kategoria saláriu no vensimentu atu rekruta funsionáriu administrasaun hamutuk 45 no ofisiál justisa hamutuk 60.

“Daudaun ne’e rekrutamentu loke ona ba públiku, hein de’it publikasaun naran definitiva hodi tuir teste,” nia akresenta.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here