Xefe Unidade Radiolojia HorEX, Humberto Baptista Soares, esplika lala’ok utilizasaun mákina x-ray iha ninia knaar fatin, HorEX, Villa nova, sesta (03/09). Imajen TATOLI/Natalino Belo

BAUCAU, 03 setembru 2021 (TATOLI)–Mákina x-ray iha Ospitál Referál Eduardo Ximenes (HorEX, sigla portugés) Baucau avaria, tanba ne’e  difikulta médiku sira analiza kondisaun moras pasiente sira.

“Ita-nia kondisaun mákina x-ray falla besik tinan rua ona, hahú tinan 2019 to’o agora, ne’ebé difikulta tebes médiku sira atu halo analiza moras hosi pasiente, bainhira hasai radiografia iha ospitál ne’e,” Xefe Unidade Radiolojia HorEX, Humberto Baptista Soares, hateten, iha ninia knaar fatin, Vila Nova, sesta ne’e.

Mákina X-Ray halo atendimentu ba pasiente hosi munisípiu Baucau, Lautém no Viqueque, ne’ebé sofre moras-laran.

“Ami halo ona relatóriu ba Diresaun Nasionál Ministériu Saúde, maibé to’o agora seidauk iha resposta. Loloos tenke foti ona solusaun tanba mákina x-ray responde ba munisípiu tolu,” nia akresenta.

Nia dehan, baibain mákina x-ray  hasai radiografia ba pasiente presiza de’it minutu lima  to’o 10, hetan ona rezultadu tanba uza sistema dijitál, maibé ho kondisaun agora daudaun rezultadu bele loron ida, tanba ne’e difikulta médiku atu foti desizaun.

Ekipametu ne’e presiza hadi’a iha sistema kalibrasaun no detetór tanba dijitál radiografia automatikamente iha aplikasaun atu atualiza.

“Ha’u rekomenda atu utiliza sistema konvensionál, nune’e bainhira dijitál falla bele subtitui malu atu garante nafatin atendimentu ba pasiente sira,” Dirijente ne’e rekomenda.

Tanba mákina ne’e ho sistema dijitál nível a’as maka halo konesaun liuhosi komponente dijitál radiografia hanesan wireless, bateria no detetór.

“Ita-nia komponente sira ne’e falla, ami labele hadi’a tanba laiha pesoál tékniku informátika no  biométriku ne’ebé responsável no hatene hadi’a sistema ne’e,” nia subliña.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here