Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 03 setembru 2021 (TATOLI)–Konsellu Administrasaun hosi Parlamentu Nasionál aprova ona orsamentu privativu ba tinan fiskál 2022 ho montante millaun $14-resin.

Orsamentu privativu ne’ebé Governu liuhosi Ministériu Finansa atribui ba Parlamentu Nasionál ho montante millaun $14,900 maibé diskusaun Konsellu Administrasaun redús rihun $200 nune’e hela millaun $14,700.

“Orsamentu privativu Parlamentun Nasionál nian ne’ebé aprova iha Konsellu Administrasaun mak millaun $14,700. Redusaun ida-ne’e mai hosi kapitál menór nian maibé Parlamentu Nasionál hanoin atu tinan oin halo konstrusaun ba edifísiu própriu Parlamentu Nasionál nian maibé osan ida-ne’e integra iha Fundu Infraestrutura (FI),” Vise-Prezidente Parlamentu Nasionál, Deputada Maria Angelina Lopes Sarmento, informa ba jornalista sira, iha uma fukun, sesta ne’e.

Diskusaun Konsellu Administrasaun nian hahú hosi loron 01-02 setembru ba orsamentu tinan fiskál 2022 nian.

Hosi orsamentu millaun $14-resin ne’e korresponde ba programa importante lima (5) mak hanesan reforsa kna’ar Parlamentu Nasionál iha área lejizlasaun, fiskalizasaun no rezolusaun sira, hametin kooperasaun no lasu amizade ho entidade sira inklui parseiru dezenvolvimentu iha nível nasionál no internasionál.

Nune’e mós reforsa igualdade jéneru, boa governasaun no programa haforsa transparante liután lian Povu nian iha kualkér atividade parlamentár.

Vise-Prezidente Parlamentu Nasionál ne’e fó-sai katak, hosi programa lima (5) ne’e sei implementa iha 2022 no programa lima iha sub-programa nomó iha atividade sira.

Iha programa balun ho sub-programa ida ka rua, maibé iha programa balun sub-programa tolu ka haat no iha atividade sub-programa 10 no bele to’o sub-programa 19.

“Programa hirak-ne’e hotu refleta ba Parlamentu Nasionál nia planu estratejiku ba lejizlatura ida-ne’e nian, ne’ebé planu estratéjiku ida-ne’e elabora no aprova hosi deputadu sira atubele hala’o Parlamentu Nasionál nia dezempeñu di’ak liután tuir mandu konstitusionál,” nia dehan.

Hafoin Konsellu Administrasaun Aprova entaun meza prezidénsia sei baixa ba Komisaun C (Finansa Públika) hafoin halo audiénsia ho kada diresaun iha uma fukun.

Hafoin finaliza audiénsia públika, sei ba debate iha plenária hahú hosi jeneralidade, espesialidade no finál globál.

Bainhiraa aprova hotu iha nílvel Parlamentu Nasionál nian, Konsellu Administrasaun uma fukun nian sei ba defende iha Komité Revizaun Orsamentu nível Polítika (KROP).

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here