Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 03 setembru 2021 (TATOLI)–Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hateten, daudaun ne’e númeru empreza ne’ebé rejista ba atividade komersiál kontinua sa’e.

“Agora númeru empreza sira ne’ebé  mai rejista iha SERVE, kada fulan ami simu empreza foun  500 to’o 800, kompara ho tinan uluk, kada fulan iha de’it 200 to’o 300,” Diretór Ezekutivu SERVE hateten iha ninia knaar fatin, Palm Business Centre, Hudi-laran, sesta ne’e.

Nia dehan, maski ho situsaun atuál, maibé timor-oan hakarak rejista hodi forma-an sai empreza, nune’e kontribui ba atividade ekonómia rai-laran.

“Númeru empreza foun ne’ebé rejista aumenta, maski situasaun COVID-19 maibé timor-oan kosiente atu halo atividade ekonómika hodi kontribui ba ekonomia nasaun. Ha’u hein katak Governu iha planu kria polítiku ida atubele promove nafatin setór privadu no apoiu sira atu nune’e sira bele filafali normál,” nia akresenta.

Notísia relevante: MTKI hein CPV hodi distribui Cesta Bázika ba reklamante 25.569

Diretór SERVE nota katak númeru empreza sa’e tanba impaktu hosi programa rekuperasaun ekonómika.

“Ha’u haree empreza barak mosu, tamba sira hakarak hola parte iha programa Governu hanesan Cesta bázika, ida-ne’e maka halo númeru rejistu emprezariál sa’e maka’as iha tinan ne’e, maski ita iha situasaun pademia maibé ita-nia maluk timor-oan sira hakarak halo atividade ekonomia,” nia apresia.

To’o loron 31 agostu, SERVE rejista empreza  foun hamutuk  35.000, ne’ebé iha balun de’it maka ativu selu taxa.

“Empreza ne’ebé ativu selu taxa ba Estadu foin 7.000 to’o 11.000 hosi totál ne’ebé eziste, ita konverte ba persentajen karik 30% maka foin selu taxa,” nia subliña.

 Jornalista : Natalino Costa

Editora    : Julia Chatarina

HAKEREK NO HATÁN

Please enter your comment!
Please enter your name here