Atividade foto hamutuk ho Brigadeiru Jenerál Calisto Santos Coli “Coliati” bainira sei asume postu Koronel ho Komandante F-FDTL sira seluk no forsa Austrália-Amerika, hafoin abertura ezersísiu “Harii Hamutuk” iha Komandu Terrestre Baucau. Imajen/F-FDTL

DILI, 03 setembru 2021 (TATOLI)—FALINTIL-Forsa Defeza Timor-Leste (F-FDTL), ho forsa armada hosi nasaun haat, hala’o ezersísiu harii hamutuk.

Ezersísiu multilaterál ho naran ‘harii hamutuk’, hosi forsa enjeñaria mai hosi nasaun parseiru-sira, tinan ne’e partisipa hosi nasaun lima mak hanesan, Estadu Unidu Amérika (EUA), Austrália, Japaun no Nova Zelándia nu’udár membru foun no Timor-Leste (TL) rasik hanesan uma-na’in.

Notísia relevante:Komandu F-FDTL apresia ezersísiu “Harii Hamutuk”

Xefe Estadu Maiór Jenerál F-FDTL, Tenente Jenerál, Lere Anan Timur, hateten, ezersísiu ida-ne’e realiza anualmente atu kapasita no troka esperiénsia liu-liu ba forsa enjeñaria TL ne’ebé presiza aprende nafatin hosi nasaun dezenvolvidu-sira, nune’e  bele hala’o misaun iha rai-laran no tuir kompromisu internasionál iha tempu oin mai.

“Maski ita iha hela pandemia COVID-19, maibé ita kontinua hala’o ezersísiu no ita kumpre protokolu hosi Ministériu Saúde (MS) ho Organizasaun Mundiál Saúde (OMS),” Lere Anan Timur, hateten ba jornalista-sira liu hosi konferénsia imprensa iha kuartel jenerál, Fatuhada, sesta ne’e.

Atividade ne’e hala’o ona iha fulan kotuk, iha postu administrativu Tilomar, munisípiu Covalima, ne’ebé militár koperante-sira hala’o manutensaun ba postu militár iha Tilomar, kanalizasaun bee moos no instalasaun eletrisidade, inklui baze militár Hera ho Metinaro ne’ebé sei termina iha loron 21 fulan setembru tinan ne’e.

Totál efetivu membru 213, kompostu hosi militár Austrália na’in 56, EUA 11, Japonés 17, Nova Zelándia rua (2) no sira seluk hosi TL.

Ezersísiu ne’e kada tinan sempre hala’o dala ida, liu-liu hala’o apoiu umanitáriu hodi harii infraestrutura hanesan klínika, eskola, dada bee moos no seluk tan.

Lere Anan Timur, la esplika detallu kona-bá tipu infraestrutura hira mak harii ona, maibé iha barak mak halo ona hanesan eskola, klínika iha postu administrativu Laleia, Manatuto, Lospalos, Dili no fatin seluk tan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here