Segundu Komandante PNTL munisípiu Baucau, Superintendente Asistente José Casimero de Carvalho. Imajen TATOLI/Natalino Costa

BAUCAU, 03 setembru 2021 (TATOLI)—Mosu asidente entre motorizada rua iha Tribunál Distritál Baucau (TDB) Villa nova, iha kinta (02/09) maizumenus tuku 14:50, hodi rezulta vítima ho inisiál MCX hakotu iis iha fatin akontesementu.

Tuir Segundu Komandante Polísia Nasionál Timor-Leste (PNTL) munisípiu Baucau, Superintendente Asistente José Casimero de Carvalho, kronolojia akontesimentu ne’e tanba motorizta na’in-rua halai ho velosidade maka’as no falta kontrolu hodi hamosu asidente.

Hafoin akontesimentu, parte kompetente konsege to’o kedas iha fatin akontesimentu, maibé vítima MCX nia vida la konsege salva, maski  evakua ona ba Hospital Referal Eduardo Ximenes (HorEX).

“Horikalan kedas parte investigasaun hosi sesaun tránzitu husu orientasaun ba Ministériu Públiku (MP), katak prosesu la’o nafatin maibé mate isin entrega ona ba família atu haloot,” Superintendente Asistente José Casimero hateten iha ninia knaar fatin, Villa nova, kinta ohin.

Enkuantu, vítima ne’ebé lori fixon, daudaun ne’e ho kondisaun grave no sei hala’o tratamentu iha ospitál referál Baucau.

“Sira na’in-rua kondús motor ho másimu no vítima MCX mak la uza kapasete, nune’e rezultadu nia mate iha fatin akontesementu,” José Casimero akresenta.

Motor rua ne’e, ida ho marka fixon númeru matríkula M 9512 ne’ebé kondús hosi motorizta mane inisiál JF tinan 28, ne’ebé halo viajen ho dirasaun hosi munisípiu Lautém atu mai Villa nova no motor Honda Revo númeru matríkula 0899, kondús hosi vítima mane inisial MCX tinan 22, ne’ebé halo viajen hodi postu Venilale atu mai Baucau villa.

Daudaun ne’e, PNTL Baucau sesaun tránzitu asegura hela evidénsia motor rua, hodi kontinua ba prosesu investigasaun no motorista JF agora seidauk bele presta deklarasaun ba parte kompetente tanba halo hela tratamentu iha ospitál.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here