Arguidu na’in-lima ne’ebé suspeita ho krime kontra bandu, tanba faan sigaru ilegál iha áre tasi Dolok Ona Cristo Rei, submete ba primeiru interrogatóriu iha Tribunál Distrital Dili, sesta (0309/21). Imajen Tatoli/Nelson de Sousa.

DILI, 03 setembru 2021 (TATOLI)—Tribunál Distritál Dili (TDD), liuhosi desizaun primeiru interrogatóriu aplika ona medida koasaun aprezentasaun periódika, ba arguidu na’in-lima, ne’ebé hala’o transaksaun  sigaru ilegál, iha área tasi-ibun Dolok-oan Cristo rei, Dili.

Arguidu sira ne’e ho inisiál JS, RC, RGM, AJS no arguidu CM  nu’udár sidadaun Ataputo, Indonézia, ne’ebé kumpre ona detensaun iha sela polísia  durante oras 72, hodi kontinua submete ba primeiru interrogatóriu iha Tribunál, sesta ne’e.

Notísia relevante:UPM detein ema na’in-lima faan sigaru iha tasi

Tuir faktu katak, iha 31 agostu arguidu hala’o transaksaun sigarru la liuhosi autoridade kompetente, hodi selu taxa ba Estadu Timor-Leste (TL) ne’ebé mai hosi área Atapupo Indonézia iha tuku 18:00, tama iha Dolok Oan, Cristo Rei iha tuku 02:19 madrugada, mak Polísia Nasionál Timor-Leste (PNTL) liuhosi  Unidade Polísia Marítima (UPM) halo detensaun.

Polísia mós halo apreensaun ba objetu hanesan ró ki’ik ida, sigarru lulun (pohon sagu) kaixa 40, motorizada beat ho xapa matrikula  O.3770, karreta  Carry ida  no kamioneta Mitsubishi Fuso ida ho xapa matrikula 60.188.

Iha prosesu ne’e envolve ema na’in-hitu inklui arguidu na’in-lima maibé na’in-rua  seluk momentu ne’ebá dezvia hosi autoridade seguransa.

Ministériu Públiku (MP), akuza arguido-sira ho krime kontra bandu previstu iha artigu 316 iha kódigu penál TL.

Artigu ne’e haktuir katak, iha aliena 1 ema ne’ebé la halo liuhosi Alfándega ka hosi kontrola seluk tan, obrigatóriu ba merkadoria ne’ebé tama ka sai hosi Timor-Leste nia territóriu bem ka merkadoria ne’ebé nia importa ka exporta, sei hetan pena prizaun tinan rua to’o neen  ka multa, alinea 2 hateten, kuandu bem ka merkadoria iha valór aas-liu $10.000 ka ajente prátika faktu-sira deskritu iha númeru anteriór, abitualmente sei aplika pena prizaun tinan rua  to’o  ualu ka multa.

Iha alinea  3, kuandu konduta referida iha númeru anteriór sira kona-bá bem ka merkadória ne’ebé tenke iha lisensa atu importa ka exporta ka nia importasaun ka exportasaun lei proibe, pena referidu iha númeru anteriór sira nia limite mínimu no másimu sei agrava datoluk ida.

Iha alegasaun MP solisita ba Tribunál primeira instánsia atu aplika prizaun preventiva ba arguidu CM nu’udár sidadaun estranjeiru, tanba laiha passaporte no arguidu na’in-haat atu aplika aprezentasaun periódika.

Maibé parte defensór públiku ne’ebé fó asisténsia legál  ba arguidu CM husu Tribunál atu aplika medida ne’ebé justu, hodi  bele deporta fila-fali ba nia rain no  atu fasilita durante  serbisu  investigasaun  maka entrega de’it arguidu ba embaixada Indonézia iha Dili.

Hafoin  primeiru interrogatóriu, Tribunál entende deside aplika de’it medida koasaun aprezentasaun periódika ba arguidu sira-hotu.

Ho ninia aplikasaun ba arguidu CM sei aprezenta an ba polísia semana ida dala rua no arguidu sira seluk aprezenta an semana ida dala de’it, hodi nune’e fasilita serbisu investigasaun bele rekolla prova sira liu-tán, hodi Ministériu Públiku aprezenta fila-fali julgamentu normál tuir-mai iha Tribunál.

Tribunál mós halo validasaun kona-bá objetu krime sigarru ne’ebé antes ne’e autoridade seguransa halo aprensaun no karreta ho motór husu atu entrega fila-fali ba na’in.

Advogadu Privadu, Marito da Silva, hateten desizaun ne’e justu no sei la halo rekursu no iha prosesu ne’e husu atu nia kliente-sira kolobora ho justisa.

Prosesu primeiru interrogatóriu ne’e prezide hosi juiz turnu Ivan Suritai, MP reprezenta hosi prokuradór Aderito Tilman no arguido-sira hetan asisténsia legál hosi advogadu privadu, Marito da Silva ho  defensór públiku, Rui Guterres.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here