Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 03 setembru 2021 (TATOLI)–Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hateten, iha fulan-agostu tinan ne’e rejista empreza nasionál no internasionál haat mak deside taka atividade negósiu.

“Pedidu ne’ebé tama ofisialmente haat, husu atu taka sira-nia atividade negósiu tanba laiha ona rendimentu atu selu  funsionáriu, selu kustu ba eletrisidade no edifísiu ne’ebé sira rasik aluga,” Diretór Ezekutivu SERVE hateten iha ninia knaar fatin, Palm Business Centre, Hudi-laran, sesta ne’e.

Empreza haat ne’e kompostu hosi nasionál ida no internasionál tolu, ne’ebé halo atividade negósiu hanesan restaurante, promosaun iha área turizmu no loja.

“Ami triste, tanba daudaun ne’e Governu halo promosaun ba área dezenvolvimentu setór privadu, maibé realizadade empreza internasionál tolu taka atividade negósiu hanesan rua loja no ida seluk kompañia boot hosi Indonézia,” Florêncio Sanches akresenta.

Nune’e, Diretór ne’e husu ba emprezáriu sira atu labele taka sira-nia kompañia, maibé suspende de’it atividade iha situasaun pandemia, hafoin bele re-ativa fali atividade bainhira situasaun normál.

SERVE mós husu ba emprezáriu ne’ebé hakarak suspende atividade ekonómika bele informa ba Dirasaun Nasionál Tributária iha Ministériu Finansa.

“Ha’u husu labele tauk atu selu taxa, kuandu ita-boot sira hakarak suspende atividade ekonómia, ba informa parte tributária, “ Dirijente ne’e sujere.

Ba kestaunne’e, SERVE kontinua husu ba Governu liuhosi Ministériu Koordenadór Asuntu Ekonómiku atu insentiva programa no atividade liuhosi meiu oin-oin hodi setór privadu labele hapara atividade negósiu tanba fó impaktu ba rendimentu ekonómiku iha rai-laran.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here