Asosiasaun Futebol Oé-Cusse (AFO) fó treinamentu ba jogadór juvenil na’in feto-mane iha kampu futeból Oébau. Imajen Tatoli/Abílio Elo Nini.

OÉ-CUSSE, 03 agostu 2021 (TATOLI)—Asosiasaun Futebol Oé-Cusse (AFO) kontinua fasilíta hodi fó treinamentu ba jogadór juvenil na’in-200 kompostu hosi feto 50 no mane 150 iha kampu futeból Oébau, Rejiaun Administrativa Espesiál Oé-Cusse Ambeno (RAEOA).

Vice Prezidente AFO, Julio Coel, informa FAO fasilita fó treinamentu kona-bá tebe-bola nian ba jogadór juvenil sira, ho objetivu prinsipál mak atu prepara fini juventude Oé-Cusse ba área desportu nian iha futuru.

Notísia Relevante: Abertura Copa AFO RAEOA sub-22 sei hala’o iha outubru

“AFO fasilita fó treinamentu ba jogadór juvenil sira hahú hosi idade 06-14 inklui mós idade 15-16. Programa ida-ne’e AFO hala’o desde iha fulan marsu 2020. Maibé, tanba pandemia COVID-19 entaun ami suspende, nune’e foin daudaun iha fulan-juñu ne’e mak foin hahú fali,” Vise- Julio Coel hateten ba Agência Tatoli iha Padimau, Oé-Cusse, sesta ne’e.

Nia dehan, labarik sira-ne’ebé patisipa iha treinamentu hamutuk na’in-200 ne’e, akompaña hosi treinadór na’in-hitu (7) ne’ebé durante ne’e hetan ona formasaun hosi Federasaun Futeból Timor-Leste (FFTL) ho sertifikadu nivél D.

Asosiasaun Futebol Oé-Cusse (AFO) fó treinamentu ba jogadór juvenil na’in feto-mane iha kampu futeból Oébau. Imajen Tatoli/Abílio Elo Nini.

Programa ida-ne’e hala’o tanba tuir planu prioridade FFTL ninian hakarak dudu atividade desportu bola to’o nivél suku no aldeia, maibé agora sei konsentra de’it iha nivél rejionál no seidauk seidauk realiza iha nivél sub-rejionál to’o suku, tanba limitasaun orsamentu nomós situasaun COVID-19.

“AFO kompromitidu, bainhira situasaun COVID-19 la’o normal, sei realiza mós treinu ba idade juvenil iha nivél suku no aldeia iha sub-rejionál sira,” nia dehan.

Vice Prezidente AFO ne’e esplika, kriteira atu involve-aan iha atividade treinamentu ba jogadór juvenil nian ne’e loke ba públiku maibé tenke hatudu dokumentu komprovativu hanesan sertidaun batizmu no sertidaun RDTL nian atu identifika idade ho loloos.

“treinamentu ne’e loke ba públiku. Sá mak hakarak mai partisipa, importante idade juvenil. Bainhira iha torneiu ruma, ida-idak sei fila ba nia klubu ka karik iha torneiu nasionál loke iha Dili no realiza ba munisipiu, ita sei halo selesaun ba ekipa feto no mane. Entaun, ho meiu ida ne’e mak kada lorokraik, AFO fó treinamentu ba jogadór juveníl sira hodi haree ba futuru,” nia dehan.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here