Diretór BTL.EP Munisípiu Viqueque, Marito da Costa. Imajen Tatoli/Vitorino Lopes da Costa.

VIQUEQUE, 02 Setembru 2021 (TATOLI)—Transformasaun Diresaun Nasionál Agua no Saneamentu (DNAS) ba Bee Timor-Leste, Empreza Públika (BTL,E.P), pesoál-sira hosi diresaun ne’e iha munisípiu Viqueque na’in-ualu hili sai funsionáriu públiku.

“Ami iha funsionáriu permanente na’in 15, kontratadu na’in-rua no voluntáriu na’in-ida ho totál na’in 18. BTL,E.P mai Viqueque loke de’it vaga ba ema na’in  14. Iha funsionáriu permanente na’in-ida la tama no ema na’in-hitu mak interesadu ho konkorre ba vaga ne’e,” Diretór DNAS Viqueque, Marito da Costa, hateten ba jornalista Agência Tatoli, iha edifísiu DNAS, Beloi, kinta ne’e.

Notísia relevante:Presiza avalia hikas prosesu konkursu iha BTL-EP

Pesoál DNAS na’in-ualu ne’ebé hili nafatin sai funsionáriu públiku, sei destaka ba iha Administrasaun Munisipál Viqueque, bazeia ba dekretu lei númeru3/2016 polítika Governu ne’ebé estabelese deskonsentrasaun munisípiu.

Iha fatin hanesan, pesoál Administrasaun no Rekursu Umanu, DNAS Viqueque, Jerónimo da Silva, deside hili konkorre ba vaga BTL,E.P, bazeia ba sosializasaun katak, instituisaun reforma ba empreza públika tanba ne’e maka fó oportundade ba funsionáriu hodi hili.

“Desizaun ne’ebé ha’u hili hakarak konkorre ba vaga BTL,E.P ba pozisaun adiministrasaun no rekursu umanu. Kona-bá vensimentu, ha’u seidauk hatene loloos, maibé iha sosializasaun-sira fó hatene ami katak, vensimentu sei la hanesan funsionáriu públiku,” Jerónimo da Silva, hateten.

Iha biban ne’e, fasilitadór DNAS Viqueque, esplika funsionáriu permanente-sira ne’ebé lakohi konkorre ba vaga ne’e, tanba idade mak avansadu ona.

“Ha’u lakohi konkorre ba vaga ne’e, tanba ami idade avansadu ona no maski ami ho esperiénsia tempu naruk to’o mai agora, serbisu iha DNAS, maibé laiha rekoñesimentu ruma hosi Estadu. Ami mós hetan sertifikadu to’o sanulu laiha valór. Maski nune’e,  bainhira BTL,E.P husu ajuda, ami sei apoiu nafatin,” nia espresa.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here