iklan

COVID-19, DILI, HEADLINE, SAÚDE, SEGURANSA

PNTL kontinua asegura implementasaun konfinamentu domisiliáriu iha Dili

PNTL kontinua asegura implementasaun konfinamentu domisiliáriu iha Dili

Membru PNTL hala’o hela pasa revista iha área Audian, hodi halo mós sosialisaun kona-bá regra konfinamentu obrigatoriu domisiliáriu ba komunidade, kinta (02/09/21). Imajen Tatoli/António Gonçalves.

DILI, 02 setembru 2021 (TATOLI)—Polísia Nasionál Timor-Leste (PNTL), munisípiu Dili, kontinua asegura implementasaun konfinamentu domisiliáriu jerál iha kapitál Dili, hodi halo prevensaun COVID-19.

Atu asegura ho efetivu liu tán, maka iha kinta ne’e, Komandante PNTL, munisípiu Dili, Superintendente Xefe, Henrique da Costa, hala’o sorumutu ho komandante eskuadra, xefe seksaun no Ofisiál Polísia Suku (OPS), hodi fó orientasaun jerál bazeia ba rezolusaun Governu.

Notísia relevante:Konfinamentu domisiliáriu Dili mantein to’o 09 setembru, hakotu iha Ermera

“Ita fó nafatin orientasaun ba membru-sira atu kontinua ho líder komunitária, autoridade lokál no Konsellu Polísia Suku hodi aviza ba ita-nia komunidade sira iha bairru no aldeia, atu kumpre regra prevensaun COVID-19,” Henrique da Costa, hateten ba jornalista-sira iha Caicoli.

Membru OPS balun relata difikukdade kona-bá rádiu komunikasaun laiha, uza rasik sira-nia pulsa no balun hetan duni motorizada, maibé kombustível laiha.

Kona-bá preokupasaun ne’e, Henrique da Costa, hateten subsídiu iha hela prosesu verifikasaun hosi komandu, bainhira konklui sei aprezenta ba Komandu Jerál.

Konsellu Ministru prodús ona projetu rezolusaun Governu hodi impoin konfinamentu domisiliáriu jerál ba populasaun iha Dili, ne’ebé sita katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.

Alende ne’e, suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha serimónia ne’e.

Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.

Restaurante-sira bele fornese hahán, aplika rejime take away ka entrega iha uma de’it no estabelesimentu seluk  taka ba públiku bele dezenvolve ninia atividade liuhosi serbisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.

Jornalista: Nelson de Sousa

Editór: Cipriano Colo

iklan
iklan

Leave a Reply

iklan
error: Content is protected !!