Katupa iha Loes, suku Uatuboro, postu Administrativu Maubara, Munisípiu Liquiça (02/09). Imajen Tatoli/Sérgio da Cruz.

Liquiça, 02 setembru 2021 (TATOLI)—Negosiante katupa iha área Loes, suku Uatuboro, postu administrativu Maubara, munisipiu Liquiça, kontinua la hetan rendimentu durante implementasaun Estadu emerjénsia.

“Tinan rua ona kaputa la folin tanba movimentu laiha. Dadeer ami tein duni, maibé dala barak ne’e ami tenke soe ka fó han fahi,” Querovina Suni Teme, hateten ba Agénsia Tatoli, iha Loes, kinta ne’e.

Notísia relevante:Negosiante katupa iha Suai Loro la hetan rendimentu

Antes pandemia COVID-19, loron ida nia tein katupa hodi faan no bele hetan $100 tanba movimentu makas, kompara ho agora la to’o $30.

Ho situasaun ne’e, nia koko tein nafatin lorloron hodi aguenta de’it moris, liuliu atu osan inan labele  lakon.

Iha fatin hanesan, Domingos Barreto, hateten durante fulan tolu ona nia la faan katupa tanba osan mak laiha ona.

“Ha’u tenke taka tanba faan la folin duni, to’o osan inan lakon hotu. Bainhira tempu normál sei buka fali osan mak foin bele faan fali,” nia espresa.

Komunidade Miguir enfrenta situasaun hanesan

Iha sorin seluk, negosiante ne’ebé faan produtu lokál iha dalan ninin, aldeia Miguir, suku Aidabaleten, postu administrativu Atabae, munisípiu Bobonaro, enfrenta mós situasaun hanesan durante periúdu pandemia COVID-19.

“Ami lakon tebes tanba uluk loron ida bele hetan to’o $15, maibé agora sasan la folin,” Romalda Gonsalves, hateten, iha merkadu lokál, Miguir, kinta ne’e.

Produtu lokál ne’ebé negosiante ne’e faan mak hanesan, baria, tomati, brinjela, pipinu, liis, akar no produtu seluk tan.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here