Koordenadór Gabinete Apoiu Sosiedade Civil (GASC), Filipe da Costa entrega akordu subvensaun públika ba KONISTIL, kinta (02/09). Imajen TATOLI/Egas Cristóvão

DILI, 02 setembru 2021 (TATOLI)-Gabinete  Apoiu Sosiedade Sivíl (GASC), kinta ne’e, iha salaun GASC, Palásiu Governu, Dili, halo asina akordu subvensaun públika ba sosiedade sivíl hanesan, ONG, grupu rezisténsia, relijiozu naun katóliku no grupu komunitáriu hamutuk 15.

Koordenadór GASC, Filipe da Costa hateten, asina subvensaun ho sosiedade sivíl sira ne’e tanba bazeia ba despaixu Primeiru-Ministru númeru 68/PM/VIII/2020.

“Ami asina subvensaun públiku ba ita-nia sosiedade sivíl sira ne’ebé sai benefísiu ne’e hamutuk na’in 15, ne’ebé ba oin atu implementa sira-nia programa,” Filipe da Costa hateten liuhosi nia diskursu bainhira atu asina akordu ho sosiedade sivíl sira.

Nia hatutan, sosiedade Sivíl sira ne’ebé ohin asina akordu subvensaun públiku ne’e tanba bazeia ba projetu 51 ne’ebé GASC  aprova iha 2021, atu implementa hosi asosiasaun, fundasaun sira, no grupu baze komunitáriu sira, entaun hosi projetu 51 ne’e daudaun sira ne’ebé prontu ona atu asina suspensaun ne’e iha 36 maibé tanba situasaun konfinamentu obrigatóriu entaun ohin 15 mak asina uluk sira seluk loron tuir mai.

Koordenadór Gabinete Apoiu Sosiedade Civil (GASC), Filipe da Costa entrega akordu subvensaun públika ba Klibur Kapasitasaun Defisente Leste, iha Palásiu Governu, kinta (02/09). Imajen TATOLI/Egas Cristóvão

“Ami mós tinan ne’e aprova projetu tan 28 ba organizasaun rezisténsia no organizasaun rejiaun sira, hanesan naun katóliku, ne’ebé hosi projetu 28 ne’e ohin organizasaun relijiozu Izlámiku Timor-Leste no seluk tan prontu ona atu asina subvensaun,” nia dehan.

Objetivu prinsipál hosi projetu 51 no 28 ne’e bazeia ba pilár estratéjiku GASC nian, entaun sira ne’ebé ohin asina ne’e ba área hanesan NGO ida ne’ebé mak servisu hasa’e rendimentu uma-kain nian, servisu ai-han nutrisaun nian, rekupera ambiente, direitu umanu demokrasia, kriativu inovativu juventude nian, saúde públiku, formasaun ortikultura, no formasaun edukasaun nian.

Orsamentu Jerál Estadu (OJE) ba fundu transferénsia públiku ba projetu sira ne’e hamutuk milaun $7, hodi finansia mós projetu 20 ne’ebé antes ne’e aprova tiha ona iha 2020 ne’ebé balu la’o hela, no projetu refere halo ona pagamentu 40% iha orsamentu 2020 nian ne’ebé atividade, ohin ne’e, kontinuasaun ba pagamentu 60%.

Orsamentu milaun $7 ne’ebé finansia mós ba projetu 20 ne’ebé antes ne’e aprova tiha ona iha 2020 hosi projetu refere projetu 12 agora daudaun ninia prosesu aprovasaun hotu ona no hetan ona pagamentu. No projetu ualu (8) hosi projetu 20 ne’e sei hein prosesu aprovasaun.

Nune’e mós projetu 43 ne’ebé aprova iha tinan kotuk 2020, hosi projetu 43 ne’e 35 mak halo ona pagamentu kompletu sira hala’o tiha ona sira-nia atividade no lima mak sei hein hela prosesu aprovasaun no rua mak dada an tanba atividade ne’ebé sira atu implementa ne’e la relevante tiha ona.

Diretór Ezekutivu Asosiasaun Klibur Kapasitasaun Defisiente Leste (ACDDL-silga portugés), Tomas da Silva Aparício agradese ba GASC tanba bele apoiu ona orsamentu $10,000.00 atu ajuda sira-nia atividade.

“Orsamentu ne’ebé ami hetan sei halo atividade hanesan halo finansia kapasitasaun rekursu umanu, asesmentu ka peskiza, advokasia hodi hakbiit defisiénsia matan sira-nia partisipasaun iha setór edukasaun, no promove partisipasaun defisiénsia iha moris,” nia hateten.

Nia dehan, programa refere sei implementa iha Munisípiu Baucau no asesmentu peskiza mak sei hala’o iha Postu Administrativu Baguia.

Iha fatin hanesan, Prezidente Konsellu Nasionál Izlámiku Timor-Leste (KONISTIL), Pascoal Pinto Soares ‘Sidiq’ Lemorai, hato’o agradese tebes ba GASC tanba fó apoiu ona orsamentu $250,000.000.

“Programa ka atividade prioridade no meta subvensaun ne’e mak ita sei finansia hanesan hakerek livru kurríkulu relijiaun Musulmanu nian ba eskola primária to’o Sekundária, apoiu fortalesimentu institusionál iha Dili no munisípiu sira, kompetisaun sertame ba estudante sira, apoiu atividade orfanatu no apoiu hahán no materiál ba orfanatu sira,” nia dehan

Halo levantamentu dadus komunidade musulmanu iha Timor-Leste, prodús livru mata dalan Sholat dala lima, atividade komemorasaun loron boot relijiaun nian inklui atividade seluk.

Nia hatutan, objetivu no rezultadu ne’ebé atu hetan hosi programa sira maka, dezenvolve instituisaun organizasaun iha nasionál no munisípiu sira, hadi’a no bele halo atendimentu públiku ho di’ak liután,
benefisiáriu sira bele sente ksolok no bele rezolve ona preokupasaun boot ne’ebé durante ne’e KONISTL enfrenta.

FHT mós hetan fundu

Fundasaun Hadomi Timor (FHT) mós hanesan organizasaun sosiedade sivíl hetan apoiu fundu totál $9,000.00 hosi GASC hodi finansia programa formasaun ba profisionál edukasaun nian iha Munisípiu Baucau.

Diretór Ezekutivu FHT, Abrão Monteiro hateten, sira submete pedidu ba GASC fó apoiu orsamentu ne’e tanba tuir sira-nia planu prinsipál liu iha proposta ne’e mak atu halo sistema baze dadus ba iha ensinu báziku sia (9) iha Munisípiu Baucau hodi nune’e profisionál Gabinete Apoiu Tékniku (GAT) ensinu báziku ninian,bele utiliza.

“Haree hosi ami-nia monitorizasaun bainhira apoiu servisu Timor-Leste Coalition for Education (TLCE) ninian ba foti dadus estudante ninian ba iha merenda eskolár, ami deteta problema barak ne’ebé iha ensinu báziku sira enfrenta, liuliu liga ho dadus tanba agora ita tama ona ba era teknolojia maibé sira-nia dadus mai nafatin ho manuál ne’ebé ladún efisiente bainhira Governu halo planu ruma kona-ba dadus,” Abrão Monteiro hateten ba Agência Tatoli  hafoin selebra akotdu transferénsia públiku hosi GASC ne’e.

Entaun ho difikuldade sira ne’ebé eskola sira hasoru mak FHT halo proposta ba GASC fó apoiu orsamentu atu fó formasaun kria baze dadus ba iha ensinu báziku Sentrál balu iha Munisípiu Baucau.

“Benefisiáriu profisionál Gabinete Apoiu Tékniku (GAT) ba ensinu báziku ninian ne’ebé ami hakarak fó formasaun atu bele utiliza sistema dadus ne’e ba ema na’in-sia tanba tuir ita-nia planu ne’e eskola ne’ebé ita fó formasaun ne’e iha Munisípiu Baucau ba Postu Administrativu tolu ne’ebé hosi postu Administrativu ne’e hamutuk eskola sia hanesan eskola haat hosi Postu Administrativu Baucau Vila, tolu hosi Venilale no rua hosi Vemasse,” nia hatutan.

Prioridade no meta subvensaun seluk mak atu finansia atividade hanesan, sorumutuk ba orientasaun atividade projetu entre ekipa servisu projetu nian, dezenvolve sistema baze dadus dijitál (Acces Data Base), revizaun módulu no sílabu hodi aliña no iha kbiit atu konkretiza bazeia ba sistema, baze dadus ne’ebé dezenvolve.

Orsamentu refere kustu ba programa ho montante $8,135.00,  kustu ba administrasaun ho montante $865 tanba ne’e ba faze dahuluk, sei transfere orsamentu 40% ho montante $3,600.00, no formasaun refere sei hala’o fulan ida ne’e sei ramata fulan dezembru 2021,” Abrão Monteiro hateten.

Benefisiáriu sira ne’ebé ohin asina akordu subvensaun públiku mak hanesan, Asosiasaun Klibur Kapasitasaun Defisiente Leste (ACDDL-sigla portugés), Konsellu Nasionál Izlámiku Timor-Leste (KONISTIL), Fundada Organizasaun Hadomi Timor, Organizasaun Sentru Uniaun Nasionál Tékniku Dezenvolvimentu Timor-Leste, Asosiasaun Chega! Ba Ita (ACBIT) no seluk tan.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here