Vítima ne’ebé hetan asidente ho Vaskolante (truk) ida xapa matríkula 54.261 TL, iha suku Horai Kiik, postu administrativu Maubisi, munisípiu Ainaro, kinta (02/09/21). Imajen Facebook.

DILI, 02 setembru 2021 (TATOLI)—Vaskolante (truk) ida ho xapa matríkula 54.261 TL, hetan asidente iha suku Horai Kiik, postu administrativu Maubisse, munisípiu Ainaro rezulta ema na’in 16 hetan kanek todan no na’in 18 kanek kamán.

Komandante PNTL, munisípiu Ainaro, Superintendente, Justino Menezes, informa, família-sira ne’e mai hosi postu administrativu Letefoho, munisípiu Ermera iha 01 setembru, ba iha postu administrativu Hatubuilico, munisípiu Ainaro atu ko’alia lia feto san umane.

Notísia relevante:Ema ida mate tanba asidente tráfegu

Iha Kinta dader, atu hala’o viajen fila-fali ba Ermera, maibé to’o iha Maubisse hetan dezastre iha tuku 9:00 otl, no iha karreta laran lori passajeiru  hamutuk ema na’in 34 kompostu hosi feto na’in-sia no mane 25.

“Kauza tanba kondutór halai ho velosidade aas la domina bolante, nune’e ba xoke ofisina ida ne’ebé iha estrada ninin, hodi rezulta karreta baku-fila hosi estrada kuaze metru rua,” Justino Menezes, hateten ba jornalista via telefónika, kinta ne’e.

Hafoin akontesimentu, polísia eskuadra Maubisse to’o kedan iha fatin, hodi transporta kedan vítima ba iha Ospitál Referál Mabisi hodi hetan tratamentu intensivu.

Iha posibilidadade, vítima balun sei halao transferénsia ba Hospitál Nasionál Guido Valadares (HNGV).

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here