Formandu hosi Canossa Vokasionál Training Center (CVTC) Covalima. Imajen/Espesiál.

DILI02 setembru 2021 (TATOLI)—Jestór Programa Canossa Vokasionál Training Center (CVTC) Covalima, Felisberto Araujo de Jesus, informa dadaun ne’e CVTC Covalima kontinua hala’o atividade formasaun tanbá formandu sira-ne’e hela iha Colégio.

Notísia Relevante: CVTC Covalima fó formasaun ba joven sira-ne’ebé la termina estudu

“Agora daudaun iha Covalima, Governu implementa serka sanitária maibé ami-nia atividade formasaun kontinua hala’o, tanbá ami-nia formandu sira hotu-hotu hela iha Colégio laran,” Felisberto Araujo de Jesus, hateten ba Agência Tatoli, via telefónika, kinta ne’e.

CVTC formandu hela colégio tanbá iha sentru ne’e fasilita dormitoriu (fatin toba) ba sira no bainhira sira atu ba sosa buat ruma ne’e, fó osan ba madre sira mak ba hola no sira hakmatek de’it iha colégio laran.

Jestór Programa CVTC Covalima, Felisberto Araujo de Jesus. Imajen/Espesiál.

“Ami-nia sentru ne’e, bainhira atu simu formandu sira, fó uluk informasaun ba sira katak, bainhira tama mai, ema sira ne’ebé hakarak duni tuir formasaun tenke hela iha colégio. Tanbá sentru ne’e fasilita hela fatin ba sira hodi hela. Se sira hela iha familia, dala ruma sira mai tarde no lia kona familia sira, entaun sira bele falta tiha. Ho ida-ne’e, ami hakarak formandu sira hela iha colégio ne’e, atu sira bele aprovita tempu tomak. Ne’ebé sira hela iha colégio ne’e, ho objetivu atu halibur formandu sira, nune’e sira bele tuir no aprende di’ak durante tuir formasaun ne’e,” nia dehan.

Formandu sira tama iha sala-de-aula hahú dadeersan tuku 07h30 no formasaun loloos ne’e hahú hosi tuku 08h00to’o tuku 10h00 deskansa, hafoin iha tuku 10h30 to’o 12h00 ne’e deskansa hodi ba almoco, no iha tuku 13h30 ne’e kontinua fali formasaun to’o tuku 15h00 ne’’e deskansa,

“Iha tuku 15h30, sira kontinua fali to’o tuku 17h00 lorokraik ne’e, formandu sira sai hosi formasaun,” nia informa.

Entretantu formadór sira hela iha sira ida-idak nia uma maibé bainhira sira iha oras atu fó formasaun ba formandu sira, mak sira mai iha colégio hodi fó formasaun ba formandu sira no  hafoin ne’e sira fila-fila ba uma.

Daudaun ne’e, atividade formasaun kontinua la’o maibé formandu sira nafatin kumpre regra prevensaun COVID-19 hosi Ministériu Saúde no Organizasaun Mundiál Saúdes (OMS) hanesan fase liman, uza maskára no halo distansiamentu sosiál.

Totál formandu ne’ebé hela iha colégio hamutuk 44, hosi númeru ne’e mane na’in-sia (9) no feto na’in-35. Formandu sira-ne’ebé hela iha colégio nee’ mai hosi munisípiu Ermera, Dili, Viqueque, Same, Bobonaro, Ainaro no Covalima.

Formandu 44 ne’e, daudaun ne’e tuir formasaun iha área ospitalidade no administrasaun. Enkuantu, funsionáriu no formadór iha Canossa Vokasionál Training Center (CVTC) Covalima, hamutuk na’in-lima (5).

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here