Admistradór postu Venilale foun, Miguel Guterres, simu simbolikamente patrimóniu Estadu hosi Admistradó postu Venilale sesante, Carlos Alberto Guterres, ne'ebé akonpanã hosi PAM Baucau, Olívio 'Bou-Lesa' Freitas, iha CCB villa antiga, kinta (02/09). Imajen TATOLI/Natalino Belo

BAUCAU, 02 agostu 2021 (TATOLI)–Administradór postu Venilale sesante, Carlos Alberto Guterres, hateten, nia parte prontu koopera hamutuk ho Administradór postu foun Miguel Mendes Manso Guterres atu dezenvolve postu Venilale. 

“Ha’u fó parabéns ba Administradór foun no prontu nafatin atu apoia no serbisu hamutuk ba Venilale nia di’ak,” Administradór postu Venilale sesante, hateten,  iha Sentru Konvensaun Baucau (CCB, sigla portugés), kinta ne’e.

Notísia relevante: Miguel Guterres simu pose nu’udar Administradór Venilale

Carlos Alberto Guterres asume kargu Administradór postu Venilale durante períodu tinan-lima hahú 2016 to’o 2021.

Nune’e, nia agradese líder komunitáriu ne’ebé durante mandatu serbisu hamutuk iha setór hotu dezenvolve postu, halo planu asaun anuál, no identifika prioridade ba nesesidade populasaun iha Venilale.

“Ha’u rekoñese durante mandatu dezenvolvimentu fíziku la la’o tanba hahú hosi 2016 foku ba eleisaun suku, iha tinan 2017 uza de’it Dotasaun Orsamentu Temporáriu (DOT), iha tinan 2018 foku ba eleisaun antesipada, iha tinan 2020 to’o 2021 hasoru problema orsamentu inklui pandemia, maibé koodenasaun serbisu di’ak tebes,” nia dehan.

Daudaun programa ne’ebé implementa iha postu Venilale maka Programa Nasionál Dezenvolvementu Suku (PNDS) ho regular no konstrusaun Uma Kbiit Laek ne’ebé kuaze atinje ona 50%.

Durante mandatu, Administradór sesante hasoru problema sosiál hanesan problema rai privadu, domíniu públiku no rai Estadu, ne’ebé konsege rezolve balun no balun seidauk.

Miguel Mendes Manso Guterres asume kargu Administradór postu Venilale, munisípiu Baucau ba mandatu tinan-haat, hahú tinan 2021 to’o 2025 liuhosi selesaun pur méritu.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here