Ministru Asuntu Parlamentár no Komunikasaun Sosiál (MAPKOMS), Francisco Jerónimo, hala’o kampaña nasionál vasina kontra COVID-19 ba populasaun no autoridade iha postu administrativu Soibada, munisípiu Manatuto, kinta (02/09/21). Imajen/MAPKOMS.

MANATUTO, 02 setembru 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, husu autoridade lokál iha postu administrativu Soibada, munisípiu Manatuto, tenke sai ezemplu ba komunidade atu simu vasina.

“Ita-sira ne’ebé mak hetan fiar hosi Estadu tenke fó informasaun loloos ba komunidade atu simu vasina, la’ós ita rasik lakohi simu responsabilidade ida-ne’e no halo fali buat seluk,” Francisco Jerónimo, husu iha ámbitu kampaña vasinasaun ba autoridade lokál no komunidade iha postu Adminsitrativu Soibada, munisípiu Manatuto, kinta (02/09/21).

Notísia relevante:MAPKOMS-MS enkoraja komunidade aldeia Labubu simu Vasina

Governante ne’e subliña katak, hanesan autoridade lokál tenke fó protesaun ba povu, tanba ne’e ho atividade ida-ne’e fó hanoin nafatin atu kontinua konsiensializa komunidade hodi prevene aan hosi peste ne’e.

Iha fatin hanesan, Diretora Jerál Prestasaun Serbisu Saúde, Odete da Silva Viegas, hateten Ministériu Saúde iha responsabilidade atu lori komunidade ba vasina no tenki atinji 80% mínimu  no bele atinji másimu 100%.

‘’Iha munisípiu Dili, populasaun hamutuk  rihun 350,  to’o agora konsege vasina ona  75% ba doze dahuluk no doze daruak 55%. Signifika, esforsu boot  ida ne’ebé munisípiu Dili halo sai duni ezemplu ba munisípiu-sira seluk,” Odete da Silva Viegas, hateten.

Odete da Silva Viegas relata, munisípiu Manatuto antes ne’e tama iha kobertura ne’ebé kiik, maibé agora  kompete ho RAEOA, Covalima no Baucau, nune’e agora atinje ona númeru ne’ebé mak di’ak.

Munisípiu Manatuto iha postu adminsitrativu neen, suku 31  no totál populasaun rihun 54.

To’o oras-ne’e munisípiu Manatuto atinje ona vasina COVID-19 doze dahuluk 51,5% no doze daruak 17,8%.

Sasin hosi vasinante

Iha fatin hanesan, Manuel Soares, ‘Rai Buras’ hanesan vasinante fó sasin katak, durante tinan barak, kilat musan iha hela nia isin lolon, no hafoin simu vasina AstraZeneca iha fulan kotuk, kilat musan ne’e konsege sai hosi nia isin.

“Iha 1978 forsa Indonézia mak tiru ha’u  iha área Laclubar no kartus metin hela iha ha’u-nia kotuk. Iha 1987 mai fali Soibada, kilat musan nafatin iha ha’u nia kotuk laran, maibé la konsege deskobre, ha’u sente moras de’it iha momentu ha’u kaer serbisu iha toos. Ha’u koko hodi buk aai-moruk atu kura maibé la konsege kura. Foin lalais ha’u simu tiha vasina, derrepente kilat musan ne’e sai-hosi kotuk laran no senti isin ne’e kamán ona,” Manuel Soares, haktuir.

Manuel Soares simu Vasina AstraZeneca iha postu saúde Soibada iha 09 agostu no kartus sai-hosi nia kotuk-laran iha 14 agostu kalan.

Iha dadeer nia ba aprezenta-an  iha postu vasinasaun no médiku halo teste ba nia saúde, maibé la deteta moras ruma no fó de’it ai-moruk hodi kura kanek ne’ebé iha.

“Tanba ne’e ha’u husu komunidade  atu ba vasina no lalika tauk  tanba vasina ne’e diak ba ita nia saúde,” nia apela.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here