Diretór Jerál Sekretariadu Tékniku Administrasaun Estatál (STAE), Acilino Manuel Branco. Imajen TATOLI/Egas Cristóvão.

DILI, 02 setembru 2021 (TATOLI)—Diretór Jerál Sekretáriu Tékniku Administrasaun Eleitorál (STAE), Acilino Manuel Branco, hateten iha atualizasaun dadus resensiamentu eleitorál iha territóriu nasionál, STAE identifika eleitór sira-ne’ebé mak mate ona kuaze 300.

Notísia Relevante: STAE-CNE lansa resensiamentu eleitorál ba preparasaun eleisaun prezidensiál 2022

“Ha’u simu informasaun hosi pesoál destakadu katak iha eleitór kuaze 300 mak mate ona. Hosi númeru ne’e, ita bele hatene totál ativamente iha sistema ne’e konserteja tun ona. Maibé iha mós eleitór foun ne’ebé mak rejistu entaun númeru ne’e tun-sae de’it. Kazu ida-ne’e foin akontese iha Munisípiu Covalima no seluk seidauk hatene,” Acilino Manuel Branco hateten ba Agência TATOLI, iha nia knaar fatin, Vera Crus, Dili, kinta ne’e.

Iha atualizasaun ne’e, STAE mós atualiza buat barak hanesan ema moris ho mate tanba iha atualizasuan ne’e família ida-idak ba reklama iha sentru atualizasaun, nune’e bele hatene hira mak mate no hira mak sei aumenta.

“Durante ne’e, ita-nia públiku kestiona kona-ba númeru eleitór ne’ebé mate maibé ita konsege servisu hamutuk ho ita-nia lideransa lokál, nune’e identifika eleitór mate ona ne’e,” nia hateten.

Identifikasaun ba eleitór sira-ne’ebé mate ona ne’e iha semana ida ka rua kotuk, maibé servisu rekollamentu kontinua la’o hela.

Iha pandemia COVID-19 ne’e, STAE esforsu atu atividade atualiza kartaun refere kontinua la’o maibé difikuldade ba komunidade mak laiha transporte públiku hodi fasilita sira ba fatin ne’ebé rejistu bá.

Komunidade balun mak iha inisiativa hodi hakbesik aan ba sentru atendementu sira, tanba sira presiza tebes kartaun eleitorál, nune’e sira bele ezerse sira-nia direitu votu iha tempu eleisaun no bele uza kartaun refere ba asuntu importante sira.

“Ita-nia ekipa kontinua atende tanba tempu halo resensiamentu eleitorál ne’e sei to’o iha fulan-janeiru 2022 nia klaran. Ita sei iha fulan haat resin hodi bele konklui resensiamentu eleitorál ne’e,” nia dehan.

Iha tempu badak, STAE sei fó sai no sei rekolla sira-nia kartaun eleitorál hosi nível nasonál no atualizasaun dadus ba kartaun eleitorál iha territóriu nasionál kontinua la’o hela ho totál 839.430 no iha diaspora ne’e hamutuk 6.000.

Notísia Relevante: 14 setembru, ekipa téknika resensiamentu eleitorál sei dezloka ba diaspora

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here