Diretór Operasaun AIFAESA, Gabriel da Costa. Imajen TATOLI/Egas Cristóvão

DILI, 02 setembru 2021 (TATOLI)—Diretór Operasaun Autoridade Inspesaun, Fiskalizasaun Atividade  Ekonomia Sanitária no Alimentar (AIFAESA), Gabriel da Costa, informa, durante atividade, ekipa ne’ebé tun terrenu identifika iha operadór ekonómiku 16 mak komete infrasaun.

“Operadór ekonómiku sira maioria produtu liu prazu no maioria hanesan estabelesimentu xineza ne’ebé halo atividade ekonómiku inklui supermerkadu boot rua iha Dili,” Diretór Operasaun AIFAESA hateten ba Agência TATOLI, via telefónika, kinta ne’e.

Nune’e, ekipa Autoridade foti ona prosesu auto-notísia kontra ordenasaun no submete ona ba parte jurídiku.

“Nune’e bolu na’in ba estabelesimentu sira, bazeia ba inspesaun ne’ebé maka ami hetan iha terrenu hodi aplika koema ba sira,” Gabriel da Costa akresenta.

Koima sei selu bazeia ba infrasaun ne’ebé komete, tuir Dekretu-Lei 23/2009 kona-ba rejime infrasaun administrativa kontra ekonomia no seguransa alimentár, ne’ebé iha artigu 13 kona-ba jéneru alimentísius ou aditivu alimentár irregulár.

“Ba Estalesimentu ka operadór ekonómiku sira ne’ebé fa’an produtu liu prazu, ko’alia klaru iha artigu 13 ne’e katak multa kiik mak $1.000 no boot mak $10.000,” nia subliña.

Jornalista : Natalino Costa

 Editora     : Julia Chatarina

HAKEREK NO HATÁN

Please enter your comment!
Please enter your name here