Ministru Edukasaun Joventude no Desportu (MEJD), Armindo Maia. Imajen Tatoli/Francisco Sony

DILI, 01 setembru 2021 (TATOLI) – Ministériu Edukasaun Juventude no Desportu (MEJD) kontinua suspende atividade ensinu aprendizajen prejensiál  iha Munisípiu Dili, Baucau, Manufahi, Covalima ho Rejiaun Administrativu Oé-Cusse Ambeno (RAEOA) tanba númeru pozitivu COVID-19 kontinua aumenta.

Ministru Edukasaun, Juventude no Desportu, Armindo Maia hateten desizaun suspende atividade letiva prosesu ensinu aprendizajen ba estudante nivel ensinu báziku to’o ensinu sekundáriu-sira iha Munisípiu haat, inklui RAEOA, hahú horisehik, tanba simu informasaun katak kazu pozitivu COVID-19 kontinua aumenta.

Ministru Armindo Maia, kuarta ne’e, informa ba jornalista sira iha Dili, katak suspensaun atividade prosesu ensinu aprendizajen iha munisípiu sira- ne’e tanba hetan konfirmasaun hosi autoridade Munisípiu sira katak kazu pozitivu kontinua aumenta no mós munisípiu Bobonaro rona iha Koléjiu Maliana mosu kazu pozitivu lubuk ida inklui Munisípiu Viqueque.

Diretór Servisu Edukasaun Rejiaun Administrativu Oe-Cusse Ambeno Daniel Mau-unu realsa katak atividade prosesu ensinu aprendizajen hosi nivel ensinu báziku to’o ensinu sekundáriu iha Oe-Cosse suspende iha loron 31 agostu 2021 durante loron sanulu resin rua (12).

Diretór Servisu Edukasaun Munisípiu Covalima, Edmundo Fereira, informa katak sira hetan medida serka sanitária ne’ebé úniku atividade ensinu aprendizajen aula prejensiál de’it mak labele realiza maibe atividade seluk kontinua lao hanesan baibain.

“Suspensaun atividade ensinu aprendizajen prejensiál hosi MEJD hahú iha loron 26 agostu to’o loron 10 setembru 2021,” Edmundo Fereira hateten.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here