Lansamentu programa mão de obra ka programa $5, iha suku Afaloikai, postu adiministrativu Uatulari, Munisípiu Viqueque, kuarta (01/09/21). Imajen Tatoli/Vitorino Lopes da Costa.

VIQUEQUE, 01 setembru 2021 (TATOLI)—Suku Afaloikai, postu adiministrativu Uatulari, Munisípiu Viqueque, lansa programa $5 ho naran programa mão de obra, hodi halo limpeza iha suku laran, kuarta ne’e.

Iha serimónia lansamentu proprama ne’e, Adimnistradór postu administrativu Uatulari, Tomas da Silva, husu joven-sira ne’ebé envolve atu serbisu iha progarama ne’e tenki serbisu ho fuan tanba limpeza iha suku laran atu halo ambiente sai moos.

Notísia relevante:Sentru joventude Viqueque simu ona proposta hosi Grupu 40

“Programa mão de obra ne’e mak ita dehan, kaer no serbisu rasik la’ós tuur iha uma de’it. Ida-ne’e serbisu iha ita-nia suku laran no iha aldeia ne’ebé ita tenki fó sentimentu katak, hadi’a suku,” Tomas da Silva, hateten ba jornalista, iha suku Afaloikai.

Tomas da Silva  husu atu serbisu presija rona-malu, nune’e serbisu bele la’o ho diak, no tenke serbisu organizadu.

Iha fatin hanesan, xefe planeamentu serbisu postu administrativu Uatulari, João Lemos, hateten programa ne’e hanesan tempu uluk liu ba karik hanaran projetu $3, maibé agora loron ida $5 kada ema.

“Programa mão de obra, ha’u mak sei haree, hamutuk ho ekipa hosi munisípiu Viqueque mak sei kontrola. Programa ne’e la’ós implementa iha Uatulari de’it, maibé iha Timor laran tomak,” nia esplika.

Xefe suku Afaloikai, Constantinho Guterres, konsidera programa ne’e hanesan programa rekoperasaun ekonómika, tanba ho situasaun COVID-19, osan mós sai difikuldade ba komunidade.

“Ha’u husu ba joven-sira tenke hamoos ho di’ak, pelu menus loron ida ne’e ema ida bele hamos metru 20,” nia husu.

Nune’e mós Xefe joventude suku Afaloikai, Salvadór Pereira Xemenes, kontente tanba Governu ho inisiativa di’ak hodi implementa programa mão de obra ne’ebé sei fó duni benefísiu ba joven-sira ne’ebé durante ne’e susar atu hetan osan.

Programa mão de obra iha suku Afaloikai, komunidade sei hala’o limpeza hosi mota Bebui to’o baliza suku Babulu ho totál kilometru hitu-resin.

Joven-sira ne’ebé servisu iha programa ne’e  kompostu hosi feto no mane hosi suku Afaloikai no fahe ba grupu haat ho kada grupu na’in-20 ne’ebé sei serbisu durante loron 26.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here