Pasiente sira iha Sentru saúde Balibo, (21/06/21). Imajen Tatoli/Sérgio da Cruz.

BOBONARO, 01 setembru 2021 (TATOLI)—Populasaun iha postu administrativu Balibo, munisípiu Bobonaro, hosi idade 18 ba leten ho komorbilidade hamutuk 57% mak simu ona vasina AstraZeneca doze dahuluk 4.280 no doze daruak 1.072 ho totál ema na’in 5.352.

“Tuir ita-nia tarjetu ne’e atu fó ba ema na’in 9.233. Hosi númeru ne’e, ita iha 5.352 mak simu ona doze dahuluk no daruak. Signifika, ita iha 57%,” Xefe Sentru Saúde Balibo, Manuel Mau-Laca da Cruz, informa ba Agência Tatoli, iha kna’ar fatin, kuarta ne’e.

Notísia relevante:Serbisu saúde Bobonaro instala postu vasinasaun iha merkadu Maliana

Tuir observasaun hosi parte Sentru saúde katak, desde implementasaun programa vasina, populasaun Balibo entuziasmu, voluntariamente mai simu vasina.

Nune’e, parte Sentru saúde Balibo mós kontinua nafatin halo sensibilizasaun kona-bá importánsia hosi Vasina,nune’e bele komvense populasaun mai simu vasina.

Pesoál saúde-sira hasoru difikuldade, kona-bá limitasaun transporte halo sira labele lori programa ne’e abranje ba to’o iha área rurál.

“Ita iha de’it karreta multifunsaun ida, motorizada ha’at mak halo operasaun iha suku hotu, maibé ami sente la sufisiente tanba área Balibo ne’e luan, ita presija atende vasina, atende inan isin-rua ho ema moras,” nia haktuir.

Komunidade Elsa Maia, rekoñese katak ho programa sensibilizasaun hosi pesoál saúde-sira mak halo nia simu vasina AstraZeneca hodi kontra COVID-19.

Elsa Maia mós husu ba Ministériu Saúde atu apoia máskara ba komunidade tanba maoria la uza máskara ho razaun kbiit la to’o atu sosa.

Jornalista: Sérgio Da Cruz

Editór: Cipriano Colo

HAKEREK NO HATÁN

Please enter your comment!
Please enter your name here